وزیر اعظم سے آذری صدر الہام علیوف کا ٹیلیفونک رابطہ،دو طرفہ تعلقات اور باہمی امور پر تبادلہ خیال

اسلام آباد:وزیراعظم محمد شہباز شریف اور آذربائیجان کے صدر الہام علییوف کے مابیم ٹیلیفونک رابطہ ہوا۔دونوںرہنماؤں درمیان نہایت گرمجوشی اور خیرسگالی پر مبنی گفتگو ہوئی، جس کے دوران انہوں نے باہمی تہنیتی پیغامات کا تبادلہ کیا اور پاکستان اور آذربائیجان کے درمیان مضبوط برادرانہ تعلقات اور دوستی کے عزم کا اعادہ کیا۔

دوران گفتگو شہباز شریف نے صدر علییوف کو آئندہ ہفتے باکو میں منعقد ہونے والے ورلڈ اربن فورم کی کامیاب انعقاد کے لیے نیک تمناؤں کا اظہار کیا انہوں نے اس اعتماد کا اظہار کیا کہ آذربائیجان کی قیادت میں یہ فورم عالمی شہری ترقی کے ایجنڈے کو آگے بڑھانے کے لیے ایک مؤثر اور اہم پلیٹ فارم ثابت ہوگا۔

رابطے میں وزیراعظم نے ناگزیر سرکاری مصروفیات کے باعث ذاتی طور پر فورم میں شرکت کرنے سے معذرت کی، تاہم انہوں نے کہا کہ پاکستان کی فورم میں اعلی سطحی نمائندگی ہوگی، دونوں رہنماؤں نے دوطرفہ تعلقات کی مثبت پیش رفت پر اطمینان کا اظہار کیا۔

ٹیلیفونک رابطے میں دونوں رہنماؤں نے تجارت و سرمایہ کاری، توانائی اور عوامی روابط سمیت باہمی دلچسپی کے شعبوں میں تعاون کو مزید فروغ دینے کے اپنے مشترکہ عزم کا اعادہ کیا، انہوں نے خطے کی صورتحال بالخصوص مشرقِ وسطیٰ میں جاری امن کوششوں اور باہمی دلچسپی کے امور پر بھی تبادلہ خیال کیا۔

رابطے میں آذری صدر علییوف نے ایران اور امریکہ کے درمیان جنگ بندی کے قیام میں پاکستان کی انتہائی کامیاب سفارتی کاوشوں کو سراہا، انہوں نے کہا کہ یہ پاکستان اور اس کی قیادت پر عالمی برادری کے اعتماد اور بھروسے کا واضح مظہر ہے۔

دونوں رہنماؤں نے قریبی رابطے برقرار رکھنے پر اتفاق کیا اور رواں سال کے آخر میں اپنی بالمشافہ ملاقات کے منتظر ہونے کا اظہار کیا، وزیراعظم نے صدر علییوف کو پاکستان کا سرکاری دورہ کرنے کی پُرخلوص دعوت کا اعادہ بھی کیا۔