پائیدارترقی کیلئےماحول دوست توانائی اور قابل تجدید ذرائع استعمال میں لانا ترجیحات میں شامل ہے،شہبازشریف 

اسلام آباد:وزیراعظم محمد شہباز شریف نے کہاہے کہ پائیدار ترقی کیلئے توانائی کے ماحول دوست قابل تجدید ذرائع استعمال میں لانا حکومت کی ترجیحات میں شامل ہے۔ 

تفصیلات کے مطابق سالڈ ویسٹ مینجمنٹ کے حوالے سے اجلاس کی صدارت کرتے ہوئے وزیراعظم نے سالڈ ویسٹ سے توانائی بنانے کیلئے ایک جامع لائحہ عمل تجویز کرنےکیلئے ٹاسک فورس بنانے کی ہدایت کی ۔ٹاسک فورس جدید ٹیکنالوجی اور عالمی تجربات کی روشنی میں سفارشات مرتب کرے گی۔

دوران اجلاس انہوں نے اسلام آباد سمیت ملک بھر میں صوبائی حکومتوں کے ساتھ مل کر سالڈ ویسٹ مینجمنٹ کا جدید اور پائیدار نظام متعارف کرانے کی ہدایت کی ۔

وزیراعظم نے کہاکہ مجوزہ ٹاسک فورس میں نجی شعبے اور بین الاقوامی شہرت کے ماہرین کی شمولیت یقینی بنا کر توانائی کے حصول سے درآمدی ایندھن پر انحصار مزید کم ہو گا اور قیمتی زرمبادلہ کی بچت ہو گی۔

وزیر اعظم شہباز شریف نےمزید کہا کہ سالڈ ویسٹ مینجمنٹ کے ایک بہتر نظام سے کاربن فٹ پرنٹ میں بھی خاطر خواہ کمی ممکن ہوگی۔