اسحاق ڈار کا ترک وزیر خارجہ سے رابطہ، خطے کی بدلتی ہوئی صورتحال پر تبادلۂ خیال

اسلام آباد: نائب وزیراعظم و وزیر خارجہ سینیٹر محمد اسحاق ڈار اور ترکیہ کے وزیر خارجہ حکان فدان کے درمیان ٹیلیفونک رابطہ ہوا۔

ترجمان دفتر خارجہ کے مطابق دونوں رہنماؤں نے خطے کی بدلتی ہوئی صورتحال پر تبادلۂ خیال کیا اور بات چیت اور تحمل کی ضرورت پر زور دیا۔

ترجمان کے مطابق رابطے میں دونوں رہنماؤں نے اس امید کا اظہار کیا کہ تمام متعلقہ فریقوں کے درمیان جلد مفاہمت پیدا ہوگی، جو خطے میں دیرپا امن اور استحکام کے قیام میں معاون ثابت ہوگی۔

ترجمان نے مزید بتایا کہ نائب وزیراعظم اور ترک وزیر خارجہ نے باہمی دلچسپی کے علاقائی اور بین الاقوامی امور پر قریبی رابطہ برقرار رکھنے پر اتفاق کیا۔ 

ترجمان کی جانب سے جاری بیان کے مطابق اسحاق ڈار نے پاکستان اور ترکیہ کے کثیرالجہتی شراکتی تعلقات کو مزید فروغ دینے کے لیے اعلیٰ سطحی روابط اور تبادلوں کا سلسلہ جاری رکھنے کے عزم کا بھی اعادہ کیا۔