بلوچستان ٹیویٹا کے وفد کا پنجاب کے ہنر مندی نظام سے سیکھنے کیلئے پی ایس ڈی ایف کا دورہ

لاہور: بلوچستان ٹیکنیکل ایجوکیشن اینڈ ووکیشنل ٹریننگ اتھارٹی (بی-ٹیویٹا) کے 14 رکنی وفد نے منیجنگ ڈائریکٹر حمود الرحمٰن کی قیادت میں پنجاب اسکلز ڈویلپمنٹ فنڈ (پی ایس ڈی ایف) کا دورہ کیا تاکہ پنجاب کے ٹیکنیکل اور ووکیشنل ایجوکیشن اینڈ ٹریننگ  نظام سے آگاہی حاصل کی جا سکے۔

15 سے 19 جون 2026 تک جاری اس مطالعاتی دورے کا مقصد پنجاب کے ہنر مندی کے شعبے کے انتظامی ڈھانچے، اداروں کے باہمی تعاون، تربیت کے معیار کی نگرانی، صنعت کے ساتھ روابط اور تربیت یافتہ نوجوانوں کو روزگار سے منسلک کرنے کے طریقہ کار کا جائزہ لینا تھا۔

پی ایس ڈی ایف میں سیکریٹری اسکلز ڈویلپمنٹ اینڈ انٹرپرینیورشپ ڈیپارٹمنٹ (ایس ڈی اینڈ ای ڈی) نادر چھٹہ نے وفد کو محکمہ کی کارکردگی اور اقدامات پر بریفنگ دی۔ انہوں نے بتایا کہ محکمہ نے ہنر مندی کے شعبے کو مقامی اور بین الاقوامی روزگار کی ضروریات سے ہم آہنگ کرنے کے لیے متعدد اقدامات کیے ہیں، جن کا بنیادی مقصد تربیت یافتہ افراد کو روزگار فراہم کرنا ہے۔

وزیراعلیٰ پنجاب ٹاسک فورس برائے اسکل ڈویلپمنٹ کے چیئرمین عدنان افضل چھٹہ نے وفد کا خیر مقدم کرتے ہوئے بتایا کہ پنجاب کے مختلف ہنر مندی ادارے باہمی تعاون کے ذریعے نوجوانوں کو جدید اور مارکیٹ کی ضروریات کے مطابق تربیت فراہم کر رہے ہیں۔ 

پی ایس ڈی ایف کے چیف ایگزیکٹو آفیسر احمد خان نے بھی وفد کو صوبے بھر میں مہارتوں کی تربیت کے فروغ میں ادارے کے کردار سے آگاہ کیا۔

دورے کے دوران بلوچستان کے وفد نے پنجاب کے مختلف نمایاں تربیتی اداروں کا دورہ کیا، صوبے کے اہم ہنر مندی اداروں کے سربراہان سے ملاقاتیں کیں اور آئی ٹی پروفیشنلز سمیت مختلف پس منظر سے تعلق رکھنے والے تربیت حاصل کرنے والے نوجوانوں کے لیے جاری تربیتی پروگراموں کا مشاہدہ کیا۔

حکام کے مطابق یہ مطالعاتی دورہ دونوں صوبوں کے درمیان باہمی سیکھنے اور تعاون کے مثبت جذبے کی عکاسی کرتا ہے، جس کا مقصد ہنر مندی کے شعبے کو مزید مضبوط بنانا اور ملک بھر کے نوجوانوں کے لیے بہتر روزگار کے مواقع پیدا کرنا ہے۔