خواجہ آصف عوام سے معافی مانگیں، شعیب صدیقی

 لاہور: استحکام پاکستان پارٹی (آئی پی پی) پنجاب کے جنرل سیکرٹری شعیب صدیقی نے وزیر دفاع خواجہ آصف کے حالیہ بیان پر سخت ردعمل دیتے ہوئے کہا ہے کہ دوسروں کو تنقید کا نشانہ بنانے سے قبل انہیں اپنی سیاسی کارکردگی اور انتخابی عمل سے متعلق عوام کو جواب دینا چاہیے۔

اپنے بیان میں شعیب صدیقی نے کہا کہ "80 سالہ خاتون سے الیکشن ہارنے والے خواجہ آصف کو دوسروں کو لیکچر دیتے ہوئے شرم آنی چاہیے۔" انہوں نے مطالبہ کیا کہ وزیر دفاع عوام سے معافی مانگیں اور وضاحت کریں کہ وہ مبینہ طور پر "بے ایمانی" سے انتخابات جیتنے کے الزامات پر کیا مؤقف رکھتے ہیں۔

آئی پی پی پنجاب کے جنرل سیکرٹری نے خواجہ آصف سے سوال کیا کہ وہ عوام کو بتائیں کہ 2018 کے عام انتخابات میں کامیابی کے لیے انہوں نے کن افراد سے حمایت حاصل کی اور ان کے بقول سابق آرمی چیف جنرل (ر) قمر جاوید باجوہ کے سسر سے ملاقات کی حقیقت کیا تھی۔

شعیب صدیقی نے مزید کہا کہ خواجہ آصف کو دوسروں پر تنقید کرنے کے بجائے پہلے اپنے سیاسی کردار اور انتخابی معاملات کا حساب دینا چاہیے۔ ان کا کہنا تھا کہ جو لوگ خود متنازع انتخابی الزامات کی زد میں ہوں، انہیں دوسروں کو اخلاقیات کا درس دینے سے گریز کرنا چاہیے۔

انہوں نے اپنے سوشل میڈیا بیان میں بھی خواجہ آصف پر کڑی تنقید کرتے ہوئے کہا کہ عوام کے سامنے حقائق رکھے جائیں اور انتخابی عمل سے متعلق تمام سوالات کا جواب دیا جائے۔