پاکستان علماء کونسل کا ’’پیغامِ پاکستان‘‘ مہم شروع کرنے کا اعلان

ویب دئسک: پاکستان علماء کونسل نے ماہِ اگست کے دوران ملک بھر میں ’’پیغامِ پاکستان‘‘ کے عنوان سے خصوصی پروگرامز منعقد کرنے کا اعلان کر دیا ہے، جن کا مقصد اسلام کے حقیقی پیغامِ امن، محبت، رواداری اور اعتدال کو عوام تک پہنچانا اور انتہا پسندی و تشدد کے رجحانات کی حوصلہ شکنی کرنا ہے۔

پاکستان علماء کونسل کے چیئرمین حافظ محمد طاہر محمود اشرفی نے لاہور میں تنظیم کے ضلعی عہدیداران سے خطاب کرتے ہوئے کہا کہ ’’پیغامِ پاکستان‘‘ ایک متفقہ قومی دستاویز ہے، جس پر تقریباً 15 ہزار علماء کرام کے علاوہ امامِ کعبہ اور امامِ مسجدِ نبویؐ کے بھی دستخط موجود ہیں۔ انہوں نے کہا کہ اس دستاویز کو گھر گھر پہنچایا جائے گا تاکہ عوام اسلام کی حقیقی تعلیمات سے آگاہ ہو سکیں۔

انہوں نے کہا کہ دینِ اسلام امن، محبت، رواداری اور اعتدال کا درس دیتا ہے، جبکہ تشدد اور انتہا پسندی کا اسلام سے کوئی تعلق نہیں۔ ان کا کہنا تھا کہ اگست بھر ملک کے مختلف شہروں میں سیمینارز، کانفرنسز اور عوامی اجتماعات کے ذریعے اس پیغام کو عام کیا جائے گا۔

حافظ طاہر محمود اشرفی نے مزید بتایا کہ ربیع الاول اور ربیع الثانی کے دوران بھی ’’پیغامِ رحمت للعالمینؐ، پیغامِ امن، محبت اور اعتدال‘‘ کے عنوان سے ملک بھر میں عوامی اجتماعات کا انعقاد کیا جائے گا۔

انہوں نے اعلان کیا کہ 30 اگست کو لاہور کے الحمرا ہال میں ’’پیغامِ رحمت للعالمینؐ کانفرنس‘‘ منعقد ہوگی، جس میں مختلف مکاتبِ فکر کے علماء، مشائخ اور دیگر اہم شخصیات شرکت کریں گی۔