آئی ایس پی آر سمر انٹرن شپ میں معلوماتی و تربیتی سیشنز

راولپنڈی: آئی ایس پی آر سمر انٹرن شپ 2026 کے تحت طلبہ کے لیے معلوماتی اور تربیتی سیشنز کا انعقاد کیا گیا، جن میں سرمایہ کاری، کاروباری مواقع، قومی ذمہ داریوں اور فکری رہنمائی سمیت مختلف اہم موضوعات پر ماہرین نے تفصیلی اظہارِ خیال کیا۔

سیشنز کے دوران شرکاء کو جدید کاروباری رجحانات، مارکیٹ کی ضروریات، سرمایہ کاری کے فروغ اور اس شعبے کو درپیش چیلنجز سے آگاہ کیا گیا۔ ماہرین نے نوجوانوں کو بدلتے معاشی تقاضوں سے ہم آہنگ ہونے اور دستیاب مواقع سے بھرپور استفادہ کرنے کی ضرورت پر زور دیا۔

پروگرام میں ریاست اور شہری کے باہمی حقوق و فرائض کے موضوع پر بھی خصوصی لیکچرز دیے گئے، جن میں ذمہ دار شہری ہونے کی اہمیت اور قومی ترقی میں نوجوانوں کے کردار کو اجاگر کیا گیا۔

اس موقع پر مفتی عبد الرحیم نے خوارج کے موضوع پر قرآن و سنت کی روشنی میں خصوصی خطاب کرتے ہوئے اس حوالے سے دینی رہنمائی فراہم کی اور طلبہ کے سوالات کے جوابات بھی دیے۔

شرکاء نے سیشنز میں بھرپور دلچسپی کا مظاہرہ کیا اور مختلف موضوعات پر فعال انداز میں تبادلۂ خیال کیا۔ طلبہ نے مستقبل میں بھی اس نوعیت کے معلوماتی اور تربیتی پروگراموں کے انعقاد کی خواہش کا اظہار کرتے ہوئے آئی ایس پی آر سمر انٹرن شپ کو نوجوانوں کی فکری، تعلیمی اور پیشہ ورانہ تربیت کے لیے ایک مؤثر اور مفید پلیٹ فارم قرار دیا۔