پاک–سعودیہ–ترکیہ دفاعی معاہدہ امتِ مسلمہ کی وحدت و مشترکہ سلامتی کو مضبوط کرے گا: اشرفی

اسلام آباد: انٹرنیشنل تعظیم حرمین شریفین کونسل کے سیکریٹری جنرل اور چیئرمین پاکستان علما کونسل حافظ محمد طاہر محمود اشرفی نے کہا ہے کہ پاکستان، مملکت سعودی عرب اور ترکیہ کے درمیان ہونے والا دفاعی معاہدہ امتِ مسلمہ کی وحدت، اتحاد اور مشترکہ سلامتی کو مضبوط بنانے میں اہم کردار ادا کرے گا۔

ایک بیان میں انہوں نے کہا کہ انٹرنیشنل تعظیم حرمین شریفین کونسل کے تمام اکابرین اس دفاعی معاہدے کو قابلِ تحسین قرار دیتے ہیں اور سمجھتے ہیں کہ یہ معاہدہ امتِ مسلمہ کی وحدت و اتحاد اور مشترکہ سلامتی کے لیے مثبت پیش رفت ہے۔

انہوں نے کہا کہ معاہدے کو فرقہ واریت یا کسی بھی قسم کی عصبیت کا رنگ دینے کی کوششیں ناکام ہوں گی اور امتِ مسلمہ کی وحدت و اتحاد کا پرچم سربلند رہے گا۔

حافظ محمد طاہر محمود اشرفی نے کہا کہ پاکستان، سعودی عرب اور ترکیہ کی قیادت نے جس طرح عالمِ عرب و اسلام کو ایران کے ساتھ تصادم سے بچانے اور اسرائیلی سازشوں کو ناکام بنانے میں کردار ادا کیا، اسی طرح ان شاء اللہ مستقبل میں بھی پاکستان، سعودی عرب، ترکیہ اور دیگر اسلامی ممالک کی قیادتیں باہمی تعاون کے ذریعے امت کے اتحاد، سلامتی اور استحکام کے لیے اقدامات آگے بڑھائیں گی۔

انہوں نے کہا کہ اسلامی ممالک کو کمزور اور غیر مستحکم کرنے والے انتہاپسند اور دہشت گرد تنظیموں کے نیٹ ورکس کے خلاف بھی مسلم ممالک کو مشترکہ اور مربوط حکمتِ عملی اختیار کرنا ہوگی۔

انہوں نے کہا کہ امتِ مسلمہ کی وحدت، سلامتی اور استحکام وقت کی اہم ترین ضرورت ہے۔