غازی آباد تھانے میں مبینہ زیادتی کیس، تفتیش میں اہم انکشافات

عدنان بھٹی سے

لاہور: لاہور کے غازی آباد تھانے میں پولیس کے اے ایس آئی کی جانب سے ذہنی معذور لڑکی سے مبینہ زیادتی کے کیس میں اہم پیش رفت سامنے آئی ہے، جبکہ تحقیقات کا دائرہ مزید وسیع کر دیا گیا ہے۔ معلوم ہوا ہے کہ متاثرہ لڑکی کو کچھ عرصہ قبل گداگری کے ایک مقدمے میں اے ایس آئی عمران نے سفارش کرکے تھانے سے چھڑوایا تھا۔

تفصیلات کے مطابق غازی آباد تھانے میں خاتون کے مبینہ جنسی استحصال کے واقعے کی تفتیش جاری ہے۔ کیس میں نامزد اے ایس آئی عمران اور متاثرہ خاتون سے ڈی ایس پی انویسٹی گیشن اور جینڈر سیل کی ٹیم نے تقریباً دو گھنٹے تک تحقیقات کیں۔

مقدمے کی ابتدائی تفتیش کے دوران خاتون کا تھانے میں موجود رہنا ثابت ہوا ہے۔ تفتیشی ذرائع کے مطابق خاتون کی تھانے میں موجودگی کا دورانیہ 30 سے 35 منٹ کے قریب سامنے آیا ہے، تاہم کئی گھنٹے تک اس کے تھانے میں موجود رہنے کے شواہد نہیں ملے۔

تفتیشی ذرائع کے مطابق متاثرہ خاتون کو کچھ عرصہ قبل گداگری کے ایک مقدمے میں گرفتار کیا گیا تھا، جہاں اے ایس آئی عمران نے سفارش کرکے اسے تھانے سے چھڑوایا تھا۔

اے ایس آئی عمران نے تفتیش کے دوران خاتون سے زیادتی کی تردید کی ہے۔ تاہم، اسے تھانے لانے کی وجہ کے بارے میں اس نے تفتیشی حکام کو مختلف جوابات دیے ہیں۔

پولیس نے اے ایس آئی عمران کے مختلف ٹیسٹ بھی کرائے ہیں۔ پولیس حکام کے مطابق فرانزک رپورٹ موصول ہونے کے بعد مبینہ زیادتی سے متعلق شواہد اور دیگر حقائق حتمی طور پر سامنے آئیں گے۔