پاکستان کسان اتحاد کےخالد کھوکھر نے گورننس پر خطرے کی گھنٹی بجا دی

ویب ڈیسک: پاکستان کسان اتحاد کے صدر خالد محمود کھوکھر نے ملک میں گورننس کی ابتر صورتحال پر شدید تشویش کا اظہار کرتے ہوئے کہا ہے کہ اگر اب بھی نظام میں بنیادی تبدیلیاں نہ لائی گئیں تو گورننس کے بحران اور کسانوں کی حالت پر ’’انا للہ وانا الیہ راجعون‘‘ پڑھ لینا چاہیے۔

انہوں نے کہا کے پاکستان دنیا کی ہر دولت سے مالا مال ہے لیکن ہمارے پاس نہ نظام ہے اور نہ ہی ارادہ ہے، کاشتکار کے نہ گھر کے حالات اچھے ہیں اور نہ کھیت کے۔   

کھوکھر نے کہا کہ ملک میں چھوٹے انتظامی یونٹس قائم کیے جائیں تو انتظامی امور نچلی سطح تک منتقل ہوں گے، جس کا براہِ راست فائدہ کسانوں سے لے کر مزدور طبقے تک پہنچے گا۔ انہوں نے خبردار کیا کہ مزید تاخیر سے ملک بہتری کی جانب جانے کے بجائے مسائل کی دلدل میں دھنستا چلا جائے گا۔

انہوں نے کہا کہ نئے صوبوں اور انتظامی یونٹس کے قیام پر بلا تاخیر عملدرآمد کیا جانا چاہیے تاکہ گورننس کا نظام مؤثر بنایا جا سکے اور کسانوں سمیت عام شہریوں کو بنیادی سہولتیں بہتر انداز میں فراہم کی جا سکیں۔

کسان اتحاد کے صدر نے زور دیا کہ انتظامی ڈھانچے میں اصلاحات اور اختیارات کی نچلی سطح تک منتقلی ہی مؤثر گورننس اور عوامی خوشحالی کی بنیاد بن سکتی ہے۔ ان کے مطابق بہتر انتظامی نظام کے نتیجے میں کسان خوشحال اور ملکی معیشت زیادہ مضبوط ہو سکتی ہے۔