پٹرولیم قیمتوں میں اضافہ مسترد، سینیٹر ڈاکٹر زرقا کا اضافہ فوری واپسی کا مطالبہ

اسلام آباد: پاکستان تحریک انصاف کی سینیٹر ڈاکٹر زرقا تیمور سہروردی نے پٹرولیم مصنوعات کی قیمتوں میں اضافے کی شدید مذمت کرتے ہوئے حکومت سے فیصلہ فوری واپس لینے کا مطالبہ کیا ہے۔

اپنے جاری کردہ ردعمل میں ڈاکٹر زرقا تیمور نے کہا کہ تحریک انصاف پٹرولیم مصنوعات کی قیمتوں میں ظالمانہ اضافے کو مسترد کرتی ہے۔ حکمران عوام کو ریلیف دینے کے بجائے مسلسل مشکلات سے دوچار کر رہے ہیں۔

انہوں نے کہا کہ پٹرولیم مصنوعات کی قیمتوں میں اضافہ کرکے حکمرانوں نے اپنی ناکامیوں اور تباہ کن پالیسیوں کا سارا بوجھ غریب عوام پر ڈال دیا ہے، جبکہ مہنگائی سے پہلے ہی پسے ہوئے عوام کے لیے زندگی مزید مشکل بنادی گئی ہے۔

سینیٹر ڈاکٹر زرقا تیمور نے کہا کہ حکمران عوام کو ریلیف دینے کے بجائے اپنی عیاشیوں میں مصروف ہیں اور انہیں بیرون ملک دوروں سے فرصت نہیں۔ انہوں نے مطالبہ کیا کہ حکومت عوام پر مزید بوجھ ڈالنے کے بجائے پٹرولیم مصنوعات کی قیمتوں میں کیا گیا اضافہ فوری واپس لے۔

انہوں نے کہا کہ عوام پہلے ہی مہنگائی، بے روزگاری اور معاشی مشکلات کا شکار ہیں، ایسے میں پٹرولیم مصنوعات کی قیمتوں میں اضافہ ان کی مشکلات میں مزید اضافہ کرے گا۔