پاکستان کے یومِ دفاع و شہداء کی مناسبت سے تھائی لینڈ میں تقریب کا انعقاد

بنکاک: پاکستان کے 61ویں یومِ دفاع و شہداء کی مناسبت سے تھائی لینڈ میں پاکستانی سفارتخانے کے زیرِ اہتمام ایک پروقار تقریب کا انعقاد کیا گیا، جس میں یومِ دفاع قومی جوش و جذبے کے ساتھ منایا گیا۔

تقریب میں تھائی حکام، سفارتکاروں، مختلف ممالک کے دفاعی اتاشیوں، صحافیوں، کاروباری شخصیات اور پاکستانی کمیونٹی کے نمائندوں نے بھرپور شرکت کی۔

اس موقع پر پاکستان کی مسلح افواج، باہمت شہداء اور عظیم غازیوں کی بے مثال قربانیوں، شجاعت اور پختہ عزم کو خراجِ تحسین پیش کیا گیا۔ مقررین نے ملک کے دفاع اور سلامتی کے لیے جانوں کا نذرانہ پیش کرنے والے شہداء کی قربانیوں کو قوم کے لیے مشعلِ راہ قرار دیا۔

تقریب کے دوران یومِ دفاع و شہداء کے حوالے سے خصوصی دستاویزی فلم بھی پیش کی گئی، جس نے شرکاء کو قومی دفاع اور شہداء کی لازوال قربانیوں کی یاد تازہ کرائی۔ پاکستانی روایتی کھانوں سے شرکاء کی تواضع نے بھی تقریب کی رونق اور وقار میں اضافہ کیا۔

تقریب کو پاکستان کی سلامتی، خودمختاری اور ترقی کے لیے قوم کے غیر متزلزل عزم کی تجدید کا ذریعہ قرار دیا گیا، جبکہ شرکاء نے ملکی ترقی اور خوشحالی کے لیے اجتماعی کاوشیں جاری رکھنے کے عزم کا اظہار کیا۔