وزیر خارجہ شاہ محمود قریشی کی امریکی اور ترک ہم منصب سے ملاقاتیں

تفصیلات کے مطابق وزیر خارجہ شاہ محمود قریشی نے نیویارک میں اقوام متحدہ کی جنرل اسمبلی کے 76 ویں اجلاس کی سائیڈلائنز پرترک وزیر خارجہ سے ملاقات کی ہے جس میں انہوں نے عالمی برادری سے افغان شہریوں کی معاونت کے لیے اقدام کی اپیل کی۔

ترک وزیر خارجہ سے ملاقات میں شاہ محمود قریشی کا کہنا تھا کہ وزیر اعظم عمران خان، پاک  ترک اعلیٰ سطح اسٹریٹیجک کونسل کے ترکی میں منعقد ہونے والے ساتویں اجلاس میں شرکت کے منتظر ہیں۔

دوسری جانب وزیر خارجہ شاہ محمود قریشی نے امریکی ہم منصب سے ملاقات کی اور انٹونی بلنکن کو افغانستان کے معاملے پر پاکستان کے مؤقف سے آگاہ کیا۔

شاہ محمود قریشی نے کہا کہ پاکستان افغانستان میں کسی ممکنہ انسانی بحران کو رکوانے کے لیے متحرک ہے اور ہم مزید افغان مہاجرین کے متحمل نہیں ہوسکتے جب کہ پاکستان افغانستان میں عالمی برادری کے تعمیری کردار کا خواہاں ہے۔

ان کا مزید کہنا تھا کہ پاکستان امریکا کے ساتھ تجارت، سرمایہ کاری اور عوامی رابطے کے فروغ کا خواہش مند ہے۔