ملک میں مہنگائی کی شرح میں  کمی، ہفتہ وار رپورٹ جاری 

ادارہ شماریات کے مطابق ملک میں  ہفتہ وار مہنگائی میں مجموعی طور پر 0.07 فیصد کمی ریکارڈ کی گئی جبکہ  گزشتہ  ہفتے کے دوران 20 اشیائے ضروریہ کی  قیمتوں میں اضافہ ہوا  اور 21 کی قیمتوں میں استحکام رہا۔ ملک میں مہنگائی کی ہفتہ وار مجموعی شرح 13.88 فیصد  رہی جبکہ کم آمدنی والے افراد کیلئے مہنگائی 16.25 فیصد رہی۔ 

ادارہ شماریات کے مطابق گھی، چاول، انڈے، چینی اور زندہ مرغی کی قیمتوں میں اضافہ نہ تھم سکا، چینی اوسط 3 پیسے فی کلو مہنگی ہوئی اور اوسط قیمت 108روپے46 پیسے فی کلو ہوگئی جبکہ ٹماٹرکی فی کلو قیمت 7 روپے 76 پیسے اضافے کے بعد فی کلو قیمت 62 روپے38 پیسے رہی۔

ادارہ شماریات کی رپورٹ کے مطابق   گزشتہ  ہفتے میں گھی 59 پیسے فی کلو مہنگا ہوا اور گھی کی اوسط فی کلو قیمت 345 روپے 70 پیسے ہوگئی جبکہ انڈے 2 روپے 98 پیسے فی درجن مہنگے ہوئے اور فی درجن قیمت 178 روپے 92 تک پہنچ گئی ۔

ادارہ شماریات کے مطابق  بیف فی کلو قیمت 88پیسے ، مٹن فی کلو  1 روپے 39 پیسے مہنگا ہوگیا جبکہ زندہ مرغی29 پیسے فی کلو مہنگی ہوئی۔

ادارہ شماریات کے مطابق گزشتہ ہفتے ایل پی جی کے گھریلوسلنڈرکی قیمت 9 روپے 41 پیسے بڑھی اور  گھریلوسلنڈرکی قیمت 1927.30 روپے ہوگئی۔ 

رپورٹ کے مطابق تازہ دودھ کی فی لیٹر قیمت میں 14 پیسے کا اضافہ ریکارڈ ہوا، گزشتہ ہفتے کے دوران 10 اشیا کی قیمتوں میں کمی ریکارڈ ہوئی  ، آٹے کا 20 کلو کا تھیلا 20روپے تک سستا ہوا جبکہ   کیلے کی فی درجن قیمت میں اوسط 5 روپے 93 پیسے کمی آئی، اس کے علاوہ لہسن 5 روپے 75 پیسے فی کلو، پیاز  2 روپے 74 پیسے سستا ہوا ۔ دال مونگ، دال ماش، دال مسور، آلو بھی سستی ہونے والی اشیا میں شامل ہیں ۔