پی ڈی ایم کا ملک بھر میں مہنگائی کیخلاف مظاہروں کا اعلان

تفصیلات کے مطابق پاکستان ڈیمو کریٹک موومنٹ کے سربراہ مولانا فضل الرحمان نے میڈیا سے گفتگو کرتے ہوئے کہا ہے کہ ملک بھر سے عام آدمی کی چیخ و پکار آسمان پر پہنچ رہی ہے اور آئے روز مہنگائی کے بم گرائے جا رہے ہیں، مہنگائی کی وجہ سے غریب آدمی خودکشی پر مجبور ہوگیا ہے۔

ان کا کہنا تھا کہ آئندہ 2 ہفتوں کے لیے پورے ملک میں احتجاج کا اعلان کر رہے ہیں اور ملک بھر کے ہر ضلعی ہیڈکوارٹر میں مظاہرے ہوں گے۔ ضلعی تنظیمیں باہمی طور پر خود ہی رابطوں میں آجائیں۔

سربراہ پی ڈی ایم کا کہنا تھا کہ تاجر، کسان اور مزدوروں سمیت تمام شہری مظاہروں میں شریک ہوں اور پہلا مرحلہ مکمل ہونے پر پی ڈی ایم اگلے مرحلے کا اعلان کرے گی، مہنگائی کے خلاف ملک بھر میں بھرپور تحریک شروع کی جائے گی اور کل اسلام آباد میں پی ڈی ایم کا سربراہی اجلاس ہو گا۔

ان کا مزید کہنا تھا کہ عام آدمی کو حکومت کے خلاف باہر نکلنا ہو گا اور پوری قوم سے درخواست کرتے ہیں کہ مظاہروں میں شریک ہوں،پی ڈی ایم کے اجلاس میں مہنگائی کے ایجنڈے پر غور کے بعد متفقہ لائحہ عمل کا اعلان کیا جائے گا۔