ملک کی ترقی کیلئے ہم کرپٹ اور چوروں کے خلاف یونہی لڑتے رہیں گے : شہباز گل

وزیراعظم کے معاون خصوصی برائے سیاسی ابلاغ ڈاکٹر شہباز گِل نے بلاول بھٹو زرداری کے بیان پر ردعمل دیتے ہوئے کہاکہ تحریک انصاف حکومت سے آپ کو تکلیف عوامی مسائل کی وجہ سے نہیں بلکہ اپنی کرپشن کی دکان بند ہونے کے باعث ہے۔

انہوں نے کہاکہ وزیراعظم عمران خان کی ذات سے یہی تکلیف ہر کرپٹ اور چور سیاستدان کو ہے، ملک کی بقا اور ترقی کیلئے ہم کرپٹ اور چوروں کے خلاف یونہی لڑتے رہیں گے۔

 ڈاکٹر شہباز گِل نے کہاکہ نااہل نواز و زرداری جیسے چوروں اور عوامی مجرموں کے خلاف لڑنا ہی وزیراعظم عمران خان کی سیاست کا مقصد و منشور ہے۔

معاون خصوصی نے کہاکہ نااہل اپوزیشن لفافوں کی مدد سے‏ 3 سال سے ایل این جی اور گیس پر پروپیگنڈہ کر رہی ہے، نااہلوں کی مہنگی بجلی کے معاہدوں پر پردہ ڈالنے کی ناکام کوششیں کی جارہی ہیں۔

ان کا کہنا تھا کہ ‏آج یورپ سمیت امریکہ اور چین میں بھی توانائی کا بحران ہے،حکومت نے مشکل وقت میں بھی 80 سے 90 فیصد تک اپنی ضرورت کے مطابق ایل این جی کا حصول ممکن بنایا۔