گزشتہ حکومتوں کا لیا گیا قرضہ واپس کررہے ہیں:فواد چوہدری

تفصیلات کے مطابق فواد چوہدری کا کہنا تھا کہ پاکستان اس وقت 2 لاکھ 40 ہزار گاڑیاں بنا رہا ہے اور گاڑیوں کی پیداوار کا ٹارگٹ 5 لاکھ تک بڑھانا چاہتے ہیں۔ 

ان کا کہنا تھا کہ صرف دو سال میں کار مینو فیکچررز کی تعداد 5 سے بڑھ کر 15 ہو گئی ہے،بینکوں کی جانب سے 338 ارب روپے کار فنانسنگ میں دیا گیا ہے اور رواں مالی سال کے پہلے 5 ماہ میں ایک لاکھ 11 ہزار 435 گاڑیاں بنیں۔ آٹو سیکٹر کی فروخت میں ریکارڈ اضافہ ہوا ہے۔

انہوں نے کہا ہے کہ زرمبادلہ کے ذخائر میں اضافہ ہوا ہے جبکہ برآمدات میں 29 فیصد اضافہ ہوا ہے،پرائیویٹ کاروباروں میں بھی اضافہ ہوا ہے اور 2 لاکھ کمپنیاں ایس ای سی پی میں رجسٹرڈ ہیں ان میں سے ایک لاکھ 50 ہزار کمپنیاں گزشتہ 3 سال کے دوران رجسٹرڈ ہوئیں۔

وفاقی وزیر اطلاعات کا کہنا تھا کہ بجلی کے استعمال میں 13 فیصد اضافہ ہوا ہے اور ڈیزل کا استعمال 26 فیصد بڑھ گیا۔ قومی فوڈ سیکیورٹی پالیسی کے لیے کمیٹی قائم کی گئی ہے۔ 

ان کا کہنا تھا کہ کراچی میں آج بھی آٹے کا تھیلا ساڑھے 13 سو روپے سے اوپر ہے اور سندھ میں 20 کلو آٹے کا تھیلا ساڑھے 13 سو روپے میں فروخت ہو رہا ہے لیکن پورے ملک میں آٹے کا 20 کلو کا تھیلا 1100 روپے کا ہے۔

انہوں نے کہا ہے کہ الیکشن ایکٹ 2017 کے سیکشن 122 میں ترمیم کی اصولی منظوری دی ہے اور یہ ترمیم سپریم کورٹ کے فیصلے کی روشنی میں کی گئی ہے۔ 

ان کا مزید کہنا تھا کہ سپریم کورٹ نے کہا تھا سینیٹ کا ووٹ قابل ٹریس ہونا چاہیے اب قانون سازی کے لیے بل پارلیمنٹ لے جائیں گے اور اگر قانون منظور ہو گیا تو سینیٹ میں ہارس ٹریڈنگ رک سکے گی۔