حکمرانوں کی نا اہلی کا خمیازہ عوام کو بھگتنا پڑ رہا ہے: مریم اورنگزیب

تفصیلات کے مطابق میڈیا سے گفتگو کرتے ہوئے مریم اورنگزیب کا کہنا تھا کہ حکومت کے پاس شہبازشریف کے خلاف ایک دھیلے کی کرپشن کا ثبوت نہیں ہے،اتنا عرصہ گزر گیا لیکن یہ کوئی ثبوت پیش نہیں کر سکے ہیں جب کہ ہرعدالتی فیصلے میں لکھا گیا کہ شہباز شریف پر کرپشن ثابت نہیں ہوئی۔

ان کا کہنا تھا کہ آمدن سے زائد اثاثوں کا کیس اب بھی نیب میں زیرسماعت ہے، ایف آئی اے بھی اسی کیس کی تحقیقات کر رہا ہے اور ایسا بھی پہلی بار ہو رہا ہے کہ دو ایجنسیاں ایک ہی کیس کی تحقیقات کر رہی ہیں۔

انہوں نے کہا ہے کہ 9 دسمبر کو درخواست دی گئی تھی کہ ہم ریڈ لسٹ پر ہیں اس لیے ثبوت نہیں دے سکتے مگر 17 ستمبر کو پاکستان ریڈ لسٹ سے ہٹ گیا تھا،انہوں نے کہا کہ 3 ماہ گزر گئے لیکن اب بھی کوئی ثبوت نہیں ہے۔

مریم اورنگزیب کا کہنا تھا کہ ملک میں غربت و مفلسی عروج پر پہنچ چکی ہے لیکن ان کو ناکامیاں چھپانے کے لیے ایسے کام کرنے پڑتے ہیں۔ انہوں نے استفسار کیا کہ بتایا جائے کہ آج شہزاد اکبر کہاں ہیں؟ ان کا کہنا تھا کہ ڈیلی میل کے وکلا نے بھی کہا کہ ہمارے پاس کرپشن کے کوئی ثبوت نہیں ہیں۔

انہوں نے کہا ہےکہ شہباز شریف کبھی بلیک میل نہیں ہوئے اور پاکستان کی ہر عدالت نے شہباز شریف کو سرخرو کیا،انہوں نے کہا کہ وہ لندن کی عدالتوں میں بھی سرخرو ہوئے ہیں،ان کا کہنا تھا کہ اب اس تماشے کو ختم ہونا چاہیے۔

ان کا مزید کہنا تھا کہ نیب نیازی گٹھ جوڑ جاری ہے لیلکن الزامات لگانے والے کو ثبوت بھی دینے چاہئیں۔