اگلے انتخابات میں سندھ میں تحریک انصاف حکومت بنائے گی :فواد چوہدری

لاہور میں صحافیوں سے بات کرتے ہوئے وزیراطلاعات فواد چوہدری نے بتایا کہ لاہور میں وزیراعظم عمران خان نے ایک اور ایسے منصوبے کاافتتاح کیا جو قوم کی تقدیر بدلے گا۔

فواد چوہدری کا کہنا تھا کہ ملک میں اس وقت 2 لاکھ کمپنیاں ہیں جن میں سے 1 لاکھ 58 ہزار گزشتہ سال بنیں۔

وزیراطلاعات نے کہا کہ اس وقت پاکستان میں گاڑیوں اور موٹرسائیکلوں کی ریکارڈ سیل ہورہی ہے۔

سیاست سے متعلق ان کا کہنا تھا کہ آصف زرداری اور نوازشریف نے ملکی معیشت کا بیڑہ غرق کردیا۔

انھوں نے یہ بھی کہا کہ آصف زرداری کو جب ضمانت ملتی ہے تو وہ بڑھکیں مارتے ہیں لیکن جب عدالت جانا ہو تو وہیل چئیر پر جاتے ہیں۔

فواد چوہدری کا یہ بھی کہنا تھا کہ پیپلزپارٹی تو لاڑکانہ جانے کے قابل بھی نہیں ہے۔ اگلے انتخابات میں سندھ میں بھی تحریک انصاف حکومت بنائے گی۔

نون لیگ سے متعلق انھوں نے کہا کہ ان کی ساری سیاست ٹی وی کے سہارے چل رہی ہے، ان کے پاس حکومت کی مخالفت کرنے کے لیے کوئی ایجنڈا نہیں ہے۔

انھوں نے کہا کہ عمران خان کا دنیا میں قد ہے اور وہ پاکستان کی قیادت کررہے ہیں۔ حکومت کا مقابلہ بونوں کے ساتھ ہے۔ عمران خان کے قد کا آدمی کسی جماعت کے پاس نہیں ہے۔