پی آئی اے کے منجمد کردہ اکاونٹس غیر منجمد کردیئے گئے ،ترجمان پی آئی اے 

تفصیلات کے مطابق ترجمان پاکستان انٹرنیشنل ائیرلائنز ( پی آئی اے)  کا کہنا ہے کہ پی آئی اے کے منجمد کردہ اکاونٹس غیر منجمد کردیئے گئے ہیں۔

  چیئرمین ایف بی آر ڈاکٹر اشفاق اور سی ای او پی آئی اے ائیر مارشل ارشد ملک کی ملاقات  ہوئی ۔سی ای او پاکستان انٹرنیشنل ائیرلائنز ارشد ملک کا کہنا ہے کہ  چیئرمین صاحب کو باور کروایا کہ پی آئی اے نامساعد حالات کے باوجود حالیہ واجبات کی ادائیگی کرتی رہے گی ، ماضی کے بقایا جات کی ادائیگی کیلئے وفاقی حکومت سے کابینہ کے  فیصلے کی روشنی میں رہنمائی لی جائے گی ۔

قبل ازیں  ذرائع ایف بی آر کے مطابق ٹکٹس پر فیڈرل ایکسائز ڈیوٹی ادا نہ کرنے پر پی آئی اے کے بینک اکاؤنٹس منجمد کیے گئے تھے، ایف بی آر ذرائع کا کہنا تھا  کہ پی آئی اے نے 2 سال سےٹکٹ پر وصول فیڈرل ایکسائز ڈیوٹی جمع نہیں کرائی ہے ، ایئر لائن نے فیڈرل ایکسائزڈیوٹی کی مد میں50 اعشاریہ 4 ارب ادا کرنے ہیں۔

ذرائع ایف بی آر نے بتایا کہ ملک بھر میں پی آئی اے کے 50 اکاؤنٹس منجمد کیے ہیں اور اس عمل سے 46 کروڑ 50 لاکھ روپے ریکور کرلیے ہیں۔ایف بی آر ذرائع کا مزید کہنا تھا کہ پی آئی اے کے اکاؤنٹس 4 ارب روپے ٹیکس ریکوری تک منجمد رہیں گے۔