جمہوریت کے لبادے میں پیپلزپارٹی کا آمرانہ طرزِ حکومت قابل مذمت ہے: اسد عمر

تفصیلات کے مطابق  وفاقی وزیر منصوبہ بندی اسد عمر نے سندھ حکومت کی جانب سے کراچی میں ایم کیو ایم کے احتجاج پر تشدد کی شدید مذمت کرتے ہوئے کہا ہےکہ جمہوریت کے لبادے میں پیپلزپارٹی کا آمرانہ طرزِ حکومت نہایت قابل مذمت ہے۔

اسد عمر نے کہا ہے کہ دستور پاکستان شہریوں کو پرامن احتجاج کا حق دیتا ہے، طاقت کے استعمال کے ذریعے حق اختلاف کو غصب کرنے کی روایت شرمناک ہے۔ 
وفاقی وزیر نے کہا کہ سندھ میں جماعتی راج کی بجائے پیپلزپارٹی آئینی حقوق کا احترام کرے، پولیس کو سیاسی جماعتوں کیخلاف برتنے کی بجائے سندھ سے جرائم کے خاتمے کیلئے استعمال کیا جائے۔

یاد رہے متنازع بلدیاتی قانون کے خلاف ایم کیو ایم پاکستان کی ریلی پر پولیس کی جانب سے لاٹھی چارج اور شیلنگ کی گئی ہے۔

متحدہ قومی موومنٹ پاکستان کی جانب سے آج سندھ کے متنازع بلدیاتی قانون کے خلاف احتجاج کیا اور ریلی نکالی جب کہ وزیراعلیٰ ہاؤس کے باہر مظاہرین کی جانب سے دھرنا بھی دیا گیا جس میں بڑی تعداد میں خواتین نے بھی شرکت کی۔

اس دوران مظاہرین نے وزیراعلیٰ ہاؤس جانے کی کوشش کی جس پر پولیس کی جانب سے مظاہرین کو منتشر کرنے کے لیے لاٹھی چارج اور شیلنگ کی گئی جب کہ ریلی میں شریک کارکنان نے سندھ حکومت کے خلاف شدید نعرے بازی کی۔