شاہ محمود قریشی نے پارلیمان اور سینیٹ کی توہین کی: یوسف رضا گیلانی

تفصیلات کے مطابق شاہ محمود قریشی کی سینیٹ اجلاس میں کی گئی تنقید پر ردعمل دیتے ہوئے یوسف رضا گیلانی کا کہنا تھا کہ وزیر خارجہ نے ایوان بالا میں میرے خلاف اس طرح بات کرکے سینیٹ کا تقدس پامال کیا ہے۔

ان کا کہنا تھا کہ میں کسی پر کوئی تبصرہ نہیں کرنا چاہتا، تاہم صرف اتنا کہوں گا میں ملک کے وزیر خارجہ سے اس نچلی سطح پر جاکر بات کرنے کی توقع نہیں رکھتا تھا۔

یوسف رضا گیلانی نے کہا ہے کہ شاہ محمود قریشی کو نہ جانے مجھ پر کس بات کا غصہ ہے، کیا ان کو میرے لیڈر آف دی اپوزیشن بننے کا آج خیال آیا ہے، یا شاید وہ یہ سمجھتے تھے کہ پاکستان پیپلز پارٹی کی اعلیٰ قیادت میرا استعفیٰ منظور کرلے گی اور استعفیٰ منظور نہ کیے جانے پر ان کو مجھ پر غصہ ہے۔

یادرہے کہ وزیر خارجہ شاہ محمود قریشی نے سینیٹ اجلاس کے دوران اپوزیشن لیڈر یوسف رضا گیلانی پر شدید تنقید کرتے ہوئے کہا تھا کہ وہ کمپرومائزڈ اور بکے ہوئے ہیں اور اپوزیشن لیڈر کے عہدے سے چپکے رہیں گے۔