وزیراعظم کی متحدہ عرب امارات کے خلاف حوثیوں کی جانب سے میزائل حملے کی کوشش کی شدید مذمت 

تفصیلات کے مطابق وزیراعظم عمران خان نے ابوظہبی کے ولی عہد اور متحدہ عرب امارات کی مسلح افواج کے ڈپٹی سپریم کمانڈر شیخ محمد بن زید النہیان سے ٹیلیفونک رابطہ کیا،  وزیراعظم نے 30 جنوری 2022 کو متحدہ عرب امارات کے خلاف حوثیوں کی جانب سے میزائل حملے کی کوشش کی شدید مذمت کی۔

وزیراعظم نے متحدہ عرب امارات کے بروقت اور موثر فضائی دفاعی ردعمل کی تعریف کی جس سے قیمتی جانیں بچ گئیں، وزیراعظم نے متحدہ عرب امارات کی قیادت، حکومت اور عوام کے ساتھ مکمل یکجہتی کا اظہار کیا، وزیراعظم نے ان حملوں میں حالیہ اضافے پر گہری تشویش کا اظہار کیا جس سے علاقائی امن و سلامتی کو شدید خطرات لاحق ہیں۔

وزیراعظم نے مذاکرات اور سفارت کاری کے ذریعے علاقائی امن و سلامتی کے تحفظ اور فروغ کی کوششوں کے لیے پاکستان کی مسلسل حمایت کا اعادہ کیا،  دونوں رہنماؤں نے دوطرفہ تعاون اور باہمی دلچسپی کے امور پر بھی تبادلہ خیال کیا،  اعلیٰ سطح پر باقاعدہ اور قریبی مشاورت جاری رکھنے پر اتفاق کیا گیا۔