وزراء اعلی کی پنجگور اور نوشکی میں سکیورٹی فورسز کے کیمپوں پر حملوں کی شدید مذمت

تفصیلات کے مطابق وزیر اعلی پنجاب سردار عثمان بزدار نے نوشکی اور پنجگور میں سیکورٹی فورسز کے کیمپوں پر حملوں کی کوشش کی مذمت کی ہے۔ 

وزیر اعلی عثمان بزدار نے دہشت گردوں کے مذموم عزائم ناکام بنانے پر سیکورٹی فورسز کو خراج تحسین پیش کیا ہے۔

وزیر اعلی عثمان بزدار نے کہا کہ وطن عزیز کے بہادر سپوتوں نے دہشت گردوں کو جہنم واصل کرکے مذموم عزائم کو خاک میں ملایا۔قوم کو سیکورٹی فورسز کی جرات پر ناز ہے۔ دشمن بزدلانہ کارروائیوں کرکے عدم استحکام پیدا کرنے کی سازش کر رہا ہے۔

انہوں نے مزید کہا کہ  قوم دہشت گردی کے خلاف یکجان ہے۔ دشمن کی کوئی سازش کامیاب نہیں ہونے دیں گے۔

دوسری جانب   بلوچستان کے علاقہ پنجگور اور نوشکئی میں دہشتگردوں کے حملے کی وزیر اعلی خیبر پختونخوا محمود خان  نے  شدید مذمت کی ہے۔ 

وزیر اعلی نے حملوں میں سکیورٹی اہلکاروں کی شہادت پر اظہار تعزیت کیا۔ شہداء کے درجات کی بلندی اور پسماندگان کے لئے صبر جمیل کی دعا۔ 

وزیر اعلی نے حملوں میں زخمی سکیورٹی اہلکاروں کی جلد صحت یابی کے لئے نیک خواہشات کا اظہارکیا۔ وزیر اعلی نے دہشتگردوں کے حملے ناکام بنانے پر سکیورٹی اہلکاروں کو خراج تحسین پیش کیا۔

وزیر اعلی خیبرپختوںخوا محمود خان نے کہا ہے کہ  ملک میں امن کے لئے سکیورٹی فورسز نے لازوال قربانیاں دی ہیں، قوم کو سکیورٹی فورسز کی قربانیوں پر فخر ہے، دہشتگردی کے خلاف جنگ میں پوری قوم سکیورٹی فورسز کے ساتھ کھڑی ہے۔