پی پی اور (ن) لیگ میں حکومت سے چھٹکارے کیلئے تمام آپشن استعمال کرنے پر اتفاق

تفصیلات کے مطابق پی پی قیادت سے ملاقات کے بعد میڈیا سے گفتگو کرتے ہوئے مسلم لیگ ن کے صدر شہباز شریف کا کہنا تھا کہ حکومت کیخلاف تمام آئینی، قانونی و سیاسی آپشنز کو استعمال کرنا ہوگا۔

قومی اسمبلی میں قائد حزب اختلاف کا کہنا تھا کہ ہم نے طے کیا ہے چند دن میں ن لیگ کی سینٹرل ایگزیکٹو کمیٹی سے مشاورت کرکے ہمارے اتحاد پی ڈی ایم میں اس معاملے کو لے کر جائیں گے، مشاورت کے ساتھ اکٹھے ہوکر حکمت عملی کا اعلان کریں گے۔

صدر مسلم لیگ ن کا کہنا تھا کہ نوازشریف دور میں بھی قرض لیےگئے،خوشحالی سب کےسامنے ہے۔ عمران نیازی کے دور میں قرضے لینے کی انتہا ہوگئی۔ نواز شریف کے لگائے گئے منصوبوں پر تختیاں لگا رہے ہیں۔ حکومت نے آج تک کوئی ایک اینٹ نہیں لگائی۔

انھوں نے کہا ہےکہ ملک میں تباہی و بربادی کےعلاوہ کچھ نظر نہیں آتا۔ حکومت کا سارا زور مخالفین پر ہے۔ مخالفین کو برا کہنے کے علاوہ ان کے پاس اور کچھ نہیں۔ 74سال میں اس طرح تباہی کا منظر پہلے نہیں دیکھا۔

شہبازشریف کا مزید کہنا تھا کہ آج ملک کے بچے بچے کو قرضے میں جکڑ لیا گیا ہے۔ پاکستان دنیا میں مہنگائی کےحوالے سے تیسرے نمبر پر ہے۔ مہنگائی میں عام آدمی پس رہا ہے،ادویات لینا مشکل ہوگیا ہے۔ عوام دیکھ رہے ہیں کب نااہل ناتجربہ کار حکومت سے جان چھوٹے گی۔