'ہم نے ملک کو بچانا ہے عمران خان کو نکالنا ہے'

تفصیلات کے مطابق اپوزیشن لیڈر قومی اسمبلی شہباز شریف کی جانب سے پیپلزپارٹی کی قیادت کے اعزاز میں ظہرانہ دیا گیا ۔

سابق صدر آصف زرداری اپنے صاحبزادے بلاول بھٹو کے ہمراہ لیگی قیادت سے ملاقات کے لیے ماڈل ٹاؤن پہنچے جہاں شہباز شریف، مریم نواز اور حمزہ شہباز نے ان کا استقبال کیا۔  

اس موقع پر خواجہ سعد رفیق اور مریم اورنگزیب بھی موجود تھیں ۔ شہباز شریف نے سابق صدر آصف علی زرداری کو ملاقات کی دعوت دی تھی۔  

دونوں جماعتوں کی قیادت نےاس اہم ملاقات میں ملک کی سیاسی صورتحال اور حکومت مخالف مارچ پر تبادلہ خیال کیا۔

ظہرانہ کے بعد میڈیا سے گفتگو کرتے ہوئے چئیرمین پیپلز پارٹی بلاول بھٹو کا کہنا تھا کہ عوامی مفاد کے لیے ہم سب ایک پیج پر ہیں۔ باقی معاملات پر ہمارا اپنا اپنا منشور ہے۔

بلاول بھٹو کا کہنا تھا کہ سیاسی جماعتوں کے مختلف نظریات ہوتے ہیں۔ ہم نے اپنا مؤقف ن لیگ کے سامنے رکھ دیا ہے۔ ن لیگ نے اپنے پلانز بھی ہمارے سامنے رکھے ہیں۔ امید ہے آگے جا کر مذید اتفاق رائے پیدا کر سکتے ہیں۔

ان کا مزید کہنا تھا کہ انتہا پسندی اور دہشت گردی پر پیپلز پارٹی کا مؤقف واضح ہے۔ عوام کا حکومت پر اعتماد اٹھ چکا ہے، پارلیمان کا بھی اب اٹھ جانا چاہیے۔  مشکل حالات میں فیصلہ لینا ضروری ہے۔