گجرات میں ن لیگ کے مرکزی رہنما الحاج امجد فاروق  مسلم لیگ ق میں شامل 

تفصیلات کے مطابق گجرات میں ن لیگ کے مرکزی رہنما الحاج امجد فاروق  مسلم لیگ ق میں شامل ہوگئے ہیں۔ الحاج امجد فاروق نے شمولیت کا اعلان قائمقام گورنر پنجاب چودھری پرویزالٰہی کی موجودگی میں کیا۔

چودھری پرویزالٰہی نے امجد فاروق کی رہائش گاہ پر خطاب میں کہا کہ  ہمارے پراجیکٹ اتنے پاور فل تھے کہ کوئی انہیں روک نہیں سکا، ہمارے دور میں ہیلتھ کارڈ کی ضرورت نہیں تھی،  ہسپتالوں میں ادویات اور علاج بالکل  مفت تھا، کچھ لوگوں کا خیال تھا کہ مسلم لیگ ق ختم ہو اب ان لوگوں کو ہم نے ہی مشکل میں ڈالا ہوا ہے۔

 چودھری پرویزالٰہی نے کہا کہ  عمران خان ایماندار اور نیک نیت ہیں وہ ملک کیلئے کچھ کرنا چاہتے ہیں، حکومت کو مشکلات کا سامنا ضرور ہے جنہیں مل کر حل کررہے ہیں، پہلے دن سے پی ٹی آئی کیساتھ ہیں انشاء اللہ انہی کے ساتھ رہیں گے اور ہر مرحلے میں ساتھ چلیں گے۔

پرویزالٰہی نے خطاب میں کہا کہ  بد قسمتی سے شہباز شریف نے ہیلتھ سیکٹرکو تباہ کر کے رکھ دیا، نیت صاف ہوتو  اللہ تعالی کی مدد بھی حاصل ہوتی ہے اور مشکلات بھی کم ہوتی ہیں، گجرات میں 1122 کے مزید اسٹیشن بنائے جارہے ہیں،  عوام کی بھلائی کے کام کر کے ہی لوگوں کے دل جیتے جا سکتے ہیں۔