افریقی ملک مڈغاسکرمیں شدید طوفان ،10افراد ہلاک 

عرب میڈیا کے مطابق طوفان باتسرائے کی وجہ سے مڈغاسکر میں اب تک کم از کم 10 افراد  جان کی بازی ہار بیٹھے ہیں جبکہ 48 ہزار سے زائد افراد کے بے گھر ہونے کی اطلاعات  ہیں ۔ طوفان  کے باعث متعدد علاقوں  کا آپس میں  رابطہ ختم ہوگیا ہے ۔

ریاستی ڈیزاسٹر مینجمنٹ اتھارٹی کے مطابق 165 کلو میٹر فی گھنٹہ کی رفتار سے آنے والے طوفان نے اپنے راستے میں موجود ہر شے کو برباد کردیا ،  ہوا کی شدت سے درخت جڑ سے اُکھڑ گئے  ، درجنوں گھر منہدم ہوگئے اور  گھروں کی چھتیں اُڑ گئیں۔

 طوفان سے درالحکومت انتنانا ریور سے 460 کلومیٹر دوری پر واقع قصبہ امبالا واؤ سب سے زیادہ متاثر ہوا ہے جبکہ لا ری یونین  میں  تقریبا 10ہزار  لوگ اتوار کو بھی بجلی سے محروم تھے  ۔ 

مڈغاسکر کے نائب وزیر ولی راہری جوآنا کا اس حوالے  سے  کہنا ہے کہ طوفان کے نتیجے میں ملک کے جنوب مشرق میں واقع علاقوں تک زمینی رابطہ منقطع ہوچکاہے ۔ انہوں نے کہا  کہ ان علاقوں سے زمینی اور مواصلاتی رابطہ نہ ہونے کی وجہ سے وہاں طوفان کی وجہ سے ہونے والے جانی اور مالی نقصان کا اندازا لگانا ابھی ممکن نہیں ہے ۔

ریاستی حکام کے مطابق رواں ہفتے میں آنیوالا  یہ دوسرا بڑا طوفان ہے ۔ نیشنل آفس فار رسک اینڈ ڈیزاسٹر منیجمنٹ نے خبردار کیا ہے کہ جزیرے کے تقریباً تمام علاقے خطرے میں ہیں ،  اس طوفان سے جزیرے کے 28 ملین افراد میں سے تقریباً 600,000 کو خطرہ ہے ۔