ٹی ٹوئنٹی ورلڈکپ2022: پاک بھارت ٹاکرے کی ٹکٹس چند گھنٹوں میں فروخت

تفصیلات کے مطابق رواں سال آسٹریلیا میں ہونے والے ٹی ٹوئنٹی ورلڈکپ کے مقابلوں کی ٹکٹوں کی فروخت شروع کردی گئی ہے، کرکٹ کے مداحوں  کو میگا ایونٹ کی ٹکٹوں کا  بے چینی سےانتظار تھا ، جس کا اندازہ اس بات سے لگایا جاسکتا ہے کہ پری بکنگ میں دو لاکھ سے زائد ٹکٹس فروخت ہوچکے ہیں۔

23 اکتوبر کو پاکستان اور بھارت کے درمیان سب سے بڑے مقابلے کے ٹکٹس بھی نایاب ہوگئیں ہیں، پاک بھارت ٹاکرے کی 60 ہزار ٹکٹس پبلک ہونےسے پہلے ہی بک کرالی گئیں ہیں۔

واضح رہے کہ میگا ایونٹ اتوار 18 اکتوبر سے اتوار 13 نومبر کے درمیان کھیلا جائے گا، جس میں 16 ٹیمیں حصہ لیں گی اور آسٹریلیا کے سات شہر میچوں کی میزبانی کریں گے ۔ میگا ایونٹ کے میچز ایڈلیڈ، برسبن، سڈنی، جیلونگ، ہوبارٹ، میلبرن اور پرتھ میں کھیلے جائیں گے۔ ٹی ٹوئنٹی ورلڈ کپ میں ٹوٹل 45 میچز شیڈول کیے گئے ہیں۔

سپر 12راؤنڈ میں ٹیموں کو دو گروپ میں تقسیم کیا گیا ہے۔ گروپ ون میں دفاعی چیمپئن آسڑیلیا، نیوزی لینڈ، انگلینڈ ، افغانستان کے علاوہ کوالیفائنگ راؤنڈ جیتنے والی 2 ٹیمیں شامل ہوں گی۔ گروپ ٹو میں  پاکستان، بھارت، بنگلا دیش اور جنوبی افریقہ کی ٹیمیں شامل ہیں دو ٹیمیں کوالیفائنگ راؤنڈ سے گروپ ٹو کا حصہ بنیں گی ۔

ورلڈ کپ کا فائنل 13 نومبر کو میلبرن کرکٹ گراونڈ میں ہوگا۔ سیمی فائنلز 9 اور 10 نومبر کو سڈی اور ایڈلیڈ میں منعقد ہوں گے۔