سعودی وزیر داخلہ  کی شیخ رشید سے ملاقات، باہمی دلچسپی کے دیگر امور پر تبادلہ خیال

تفصیلات  کے مطابق  سعودی وزیر داخلہ پرنس عبدالعزیز بن سعود بن نائف کی وفد کے ہمراہ وزارت داخلہ آمد،  وزیر داخلہ شیخ رشید احمد اور وزارت داخلہ کے اعلی حکام سے ملاقات کی۔ملاقات میں  علاقائی سکیورٹی صورتحال سمیت باہمی دلچسپی کے دیگر امور پر بات چیت کی گئی۔

ملاقات میں مشیر برائے احتساب بریگیڈیئر ریٹائرڈ مصدق عباسی اور سیکرٹری داخلہ یوسف نسیم کھوکھر سمیت دیگرحکام نے شرکت کی، سعودی وزیر داخلہ پرنس عبدل عزیر بن سعود بن نائف کیساتھ 7 رکنی اعلی سعودی حکام کا وفد بھی پاکستان پہنچا ہے۔

اعلامیے میں کہا گیا ہے کہ  پاکستان اور سعودی عرب کے داخلہ امور کی وزارتوں کے درمیان روابط کو مزیدمضبوط کرنے پر زور دیا گیا ہے، سکیورٹی چیلنجز سمیت دیگر مسائل سے نمٹنے کے لئے وزارتوں کے درمیان بہتر روابط ضروری ہیں۔

وزیر داخلہ شیخ رشید نے کہا ہے کہ  پاکستان اورسعودی عرب کے درمیان تعلقات انتہائی دیرینہ ہیں، پاکستان ، سعودی عرب کے ساتھ اپنے تعلقات کو بہت اہمیت دیتا ہے۔

سعودی وزیر داخلہ پرنس عبدالعزیز بن سعود بن نائف  نے کہا کہ  پاکستان اور سعودی عرب کے درمیان تعلقات باہمی اعتماد اور اسلامی بھائی چارے پر قائم ہیں۔

شیخ رشید نے کہا کہ  سعودی عرب میں کام کرنے والے بیس لاکھ پاکستانی ہمارا قیمتی اثاثہ ہیں، پاکستانی ورکرز کی بہترین دیکھ بھال پر سعودی حکومت کے شکر گزار ہیں۔