شہباز شریف اور چوہدری برادران  کے درمیان ملاقات کی اندرونی کہانی سامنے آگئی

ذرائع کے مطابق شہباز شریف اور چوہدری برادران  کے درمیان ملاقات کی اندرونی کہانی سامنے آگی ہے،  ملاقات کے تین دور ہوئے  ہیں ۔

پہلے دور میں دونوں  پارٹیوں  کی قیادت شریک ہوئی ،  دوسرے دور میں شہباز شریف ، چوہدری شجاعت حسین اور پرویز الہی شریک ہوئے جبکہ  تیسرے دور میں شہباز شریف ، شجاعت حسین پرویز الہی کے ساتھ  سعد رفیق اور  ایاز صادق  بھی شریک ہوئے۔ دونوں  پارٹیوں کے قائد ین  کے درمیان ایک گھنٹہ سے زائد ملاقات  جاری رہی۔

ذرائع نے کہا ہے کہ ملاقات میں شہباز شریف نے اپوزیشن کے فیصلوں بارے اعتماد میں لیا ۔شہباز شریف نے درخواست کی کہ  عدم اعتماد لانے کا فیصلہ کیا ہے، ساتھ دیا جائے، آپ کے حکومت بارے تحفظات بھی سامنے آتے رہتے  ہیں  اب بڑا فیصلہ کریں ، آصف علی زرداری اور مولانا فضل الرحمن بھی آپ سے ملے ہیں ، اپوز یشن  یکسو ہے کہ حکومت کو گھر جانا چاہیے۔

اس موقع پر چوہدری برادران نے کہا کہ  ہم سیاسی صورت حال پر پارٹی سے مشاورت کریں گے،  آنے والے دن اہم  ہیں، ہم صورت حال کے تناظر میں غور کے بعد لائحہ عمل اختیار کریں گے۔