برازیل : طوفانی بارشوں اور لینڈ سلائیڈنگ کے باعث مختلف حادثات میں 100 کے قریب افراد ہلاک

غیر ملکی خبر رساں ادارے کے مطابق برازیل کے شہر پیٹرو پولس میں طوفانی بارشوں اور لینڈ سلائیڈنگ کے باعث مختلف حادثات میں 100 کے قریب افراد ہلاک ہوگئے ہیں جبکہ درجنوں لاپتہ ہیں۔ طوفانی بارشوں نے ہر طرف تباہی مچا رکھی ہے کئی مکانات تباہ ہوگئے ہیں اور پانی کے تیز بہاو کے باعث راستے میں آنے والی ہر چیز بہہ گئی ہے۔

برازیلی نیشنل سول ڈیفنس حکام نے 94 افراد کی ہلاکت کی تصدیق کردی ہے اور ان کا کہنا ہے کہ  اب تک 24 افراد کو زندہ بچایا جا چکا ہے جبکہ سرچ اینڈ ریسکیو آپریشن جاری ہے۔

گورنر کلاڈیو کاسترو  نے کہا ہے کہ پیٹروپولس میں35 افراد تاحال لاپتہ ہیں جن کی تلاش کے لیے امدادی کارروائیاں جاری ہیں۔

خیال رہے کہ  پیٹروپولس برازیل کا ایک مشہور سیاحتی علاقہ ہے، لیکن صرف تین روز میں ایک ماہ کے برابر ہونے والی شدید بارشوں نے شہر میں تباہی مچا دی ہے۔