فیصل واوڈا نے تاحیات نااہلی کا فیصلہ سپریم کورٹ میں چیلنج کردیا 

تفصیلات کے مطابق  پی ٹی آئی رہنما اور سابق وفاقی وزیر فیصل واوڈا  کی جانب سے  وسیم سجاد ایڈووکیٹ نےسپریم کورٹ میں  اپیل دائر کی، درخواست میں  الیکشن کمیشن اور مخالف شکایت کنندگان کو فریق بنایا ہے۔

 فیصل واؤڈا کا اپیل میں کہنا ہے کہ الیکشن کمیشن کو تاحیات نااہل کرنے کا اختیار نہیں تھا،الیکشن کمیشن مجاز کورٹ آف لاء نہیں،اسلام آباد ہائیکورٹ نے عجلت میں اپیل خارج کی۔

پی ٹی آئی رہنما  نے اپیل میں موقف اختیار کیا کہ فیصل واؤڈا نے الیکشن کمیشن سے کچھ نہیں چھپایا،الیکشن کمیشن نے اپنے اختیارات سے تجاوز کیا،الیکشن کمیشن کے پاس آرٹیکل 62 ون ایف کے اطلاق کا اختیار نہیں ہے۔ امریکی شہریت پیدائش سے ہی ملی بعد میں نہیں لی گئی۔ 

پی ٹی آئی رہنما کی جانب سے دائر درخواست میں استدعا کی گئی ہے کہ الیکشن کمیشن کا نااہلی کا فیصلہ کالعدم قرار دے کر سینیٹر کے عہدے پر بحال کیا جائے اور اسلام آباد ہائیکورٹ کے فیصلوں کو بھی کالعدم قرار دیا جائے۔

خیال رہے کہ 16 فروری کو اسلام آباد ہائیکورٹ نے فیصل ووڈا کی نااہلی کیخلاف درخواست مسترد  کردی تھی ۔ 

واضح رہے کہ چیف الیکشن کمشنر کی سربراہی میں تین رکنی بینچ نے  فیصل واوڈا کو دہری شہریت کیس میں نااہل قرار دیدیا تھا۔