ادارہ شماریات نے مہنگائی سے متعلق ہفتہ وار رپورٹ جاری کردی

تفصیلات کے مطابق ادارہ شماریات نے مہنگائی سے متعلق ہفتہ وار رپورٹ جاری کردی ہے،ادارہ شماریات کے مطابق مہنگائی کی شرح میں 0.22 فیصد اضافہ  ہوا ،  ملک میں مہنگائی کی مجموعی شرح 18.09 فیصد  ہوگئی  جبکہ  سب سے کم آمدن والے افراد کے لیے مہنگائی 19.40 فیصد ہوگئی ہے۔

ادارہ شماریات کی رپورٹ کے مطابق  ایک ہفتے میں 28 اشیاء کی قیمتوں میں اضافہ ہوا ، حالیہ ہفتے میں پیٹرول ، ڈیزل کی قیمتوں میں اضافہ ہوا ، ایک ہفتے میں لہسن 37 روپے 76 پیسے مہنگا ہوا ، ٹماٹر کی قیمت میں 5 روپے 54 پیسے فی کلو اضافہ ہوا ، زندہ مرغی 6 روپے 21 پیسے فی کلو مہنگی ہوئی ۔رپورٹ میں کہا گیاہے کہ  ایک ہفتے میں ماچس کی ڈبی 8 پیسے مہنگی ہوئی ، ایک ہفتے میں گھی 3 روپے 83 پیسے مہنگا ہوا ، حالیہ ہفتے مٹن ، بیف ، دال چنا ، دال مسور ، دودھ ، دہی بھی مہنگے ہوئے ۔

ادارہ شماریات کے  مطابق  ایک ہفتے میں 11 اشیاء کی قیمتوں میں کمی ، 12 میں استحکام رہا ، ایک ہفتے میں پیاز 51 پیسے ، آلو 33 پیسے فی کلو سستے ہوئے ، آٹے کا 20 کلو کا تھیلہ 3 روپے 12 پیسے سستے ہوئے ، چینی 47 پیسے فی کلو سستی ہوئی ، حالیہ ہفتے دال مونگ، دال ماش ، ایل پی جی اور گڑ سستا ہوا ۔