شہباز شریف کی جہانگیر ترین سے خفیہ ملاقات

اپوزیشن لیڈر اور نون لیگ کے صدر شہباز شریف نے پی ٹی آئی کے ناراض رہنما جہانگیر ترین سے خفیہ ملاقات کی، جس میں شہباز شریف نے وزیراعظم کے خلاف عدم اعتماد پر تعاون مانگ لیا۔

ذرائع کے مطابق چند روز قبل دونوں سیاستدانوں نے عمران خان حکومت اور اسکی قسمت کے حوالے سے بات چیت کی ہے، رابطہ کرنے پر جہانگیر ترین نے اپوزیشن کی جانب سے وزیراعظم عمران خان کیخلاف عدم اعتماد کی تحریک لانے کے تناظر میں اس اہم ترین ملاقات کے حوالے سے کوئی موقف نہیں دیا۔  

شہباز شریف سے خفیہ ملاقات کی تصدیق یا تردید کیے بغیر جہانگیر ترین نے کہا کہ حکمران جماعت سے تعلق رکھنے والے ان کے گروپ میں شامل ارکان قومی و صوبائی اسمبلی نے انہیں کوئی بھی سیاسی فیصلہ کرنے کا مینڈیٹ دے رکھا ہے.

ایک سوال کے جواب میں جہانگیر ترین نے کہا کہ ان کے گروپ میں شامل ارکان پارلیمنٹ کی تعداد 30؍سے زیادہ ہے, سیاست دانوں کے ساتھ بات چیت پر یقین رکھتے ہیں۔ ایسے رابطے سیاست کا حصہ ہیں۔