جعلی خبروں پر 5 سال کی سزا اور جرم ناقابل ضمانت ہوگا:وفاقی وزیر قانون فروغ نسیم

وفاقی وزیر قانون فروغ نسیم نے پریس کانفرنس کرتے ہوئے کہا ہےکہ صحافت ریاست کا چوتھا ستون ہے، آج کے دور میں میڈیا کی بڑی اہمیت ہے جبکہ جھوٹی خبر معاشرے کو نقصان پہنچاتی ہے۔

انہوں نے کہا ہےکہ پیکا اور الیکشن کا آرڈیننس جاری ہو گیا ہے،پیکا والے قانون کی ڈرافٹنگ میں نے کی ہے جبکہ الیکشن کوڈ آف کنڈکٹ کا ایکٹ بابر اعوان نے بنایا ہے۔ پیکا قانون سب کے لیے ہو گا،حکومت پہلی بار جرنلسٹس پروٹیکشن بل لائی ہے۔

فروغ نسیم نے کہا ہےکہ بعض لوگ ملک میں ہیجانی کیفیت پیدا کرنا چاہتے ہیں،میڈیا تنقید کرنے میں آزاد ہے لیکن جھوٹی خبر نہیں ہونی چاہیے اور جھوٹی خبروں کی روک تھام کے لیے یہ قانون ضروری تھا۔ یہ آرڈیننس میڈیا پر قدغن سے متعلق نہیں ہے۔

انہوں نے کہا ہےکہ جعلی خبر پر 3 سال کی جگہ 5 سال تک سزا ہو سکتی ہے اور جعلی خبر پر 6 ماہ کے اندر فیصلہ کیا جائے گا۔ میڈیا جعلی خبریں نشر نہ کرے کیونکہ جس معاشرے کی بنیاد جھوٹ پر رکھی جائے تو کیا بنے گا؟ خاتون اول سے متعلق غلط خبریں پھیلانا کیا ٹھیک ہے؟

وفاقی وزیر قانون نے کہا ہے کہ جعلی خبروں پر کسی کو استثنیٰ حاصل نہیں ہو گا اور جعلی خبر دینے والی کی ضمانت بھی نہیں ہو گی۔ سابق چیف جسٹس کے خلاف کتنے غلط الفاظ استعمال کیے گئے اور وزیر اعظم کی ذاتی زندگی سے متعلق باتیں پھیلائی گئیں۔

ان کا مزید کہنا تھا کہ اگر آرڈیننس غلط تھا تو 18ویں ترمیم کے دوران ختم کر دیتے جبکہ غیر جمہوری وہ چیز ہوتی ہے جو قانون اور آئین میں نہ ہو۔