وزیر اعلیٰ پنجاب پتنگ بازی کے واقعات پر برہم

تفصیلات کے مطابق سردار عثمان بزدار نے دبئی سے انسپکٹر جنرل پولیس پنجاب کو ہدایات دی کہ پتنگ بازی پر پابندی کے قانون پر سختی سے عمل درآمد کروایا جائے، پتنگ بازی میں ملوث افراد کے خلاف بلاامتیاز ایکشن لیا جائے۔

عثمان بزدار نے کہا کہ پتنگ بازی کے واقعات کا ہونا کسی صورت برداشت نہیں۔  
واضح رہے کہ اس سے قبل وزیر اعلیٰ پنجاب سردار عثمان بزدار نے کہا تھا کہ جہاں کہیں بھی پتنگ بازی ہوگی، وہاں کی انتظامیہ اور پولیس حکام ذمہ دار ہوں گے۔

انہوں نے پتنگ بازی کے واقعات کی روک تھام کیلئے صوبائی انتظامیہ اور اعلیٰ پولیس حکام کو ہدایات جاری کردی تھیں، اس حوالے سے ان کا کہنا تھا کہ پتنگ بازی پر پابندی کے قانون پر سختی سے عملدرآمد یقینی بنایا جائے۔

ان کا کہنا تھا کہ خلاف ورزی کرنے والوں کے خلاف قانون کے تحت کارروائی کی جائے، پتنگ بازی کے واقعات قطعاً برداشت نہیں، جہاں کہیں بھی پتنگ بازی ہوگی وہاں کی انتظامیہ اور پولیس حکام ذمہ دار ہوں گے۔

وزیر اعلیٰ نے بعض شہروں میں پتنگ بازی کے واقعات پر شدید برہمی کا اظہار کیا تھا، ان کا کہنا تھا کہ انسانی جان کا تحفظ ہمارا سب سے بڑا فریضہ ہے، کھیل کے شوق کو انسانی جان پر ترجیح نہیں دی جاسکتی۔

ان کا کہنا تھا کہ انتظامیہ اور پولیس عوام کے جان و مال کے تحفظ کیلئے اپنی ذمہ داریاں ادا کرے ورنہ میں بھرپور ایکشن لوں گا، پولیس اور انتظامیہ پتنگ بازی روکنے کیلئے مزید موثر اقدامات اٹھائیں۔