مادری زبانوں کا عالمی دن 

اس سال دن کا موضوع ہے" مختلف زبانوں کا تعلیم اور معاشرے میں شمولیت کیلئے فروغ" ۔

 یونیسکو کے مطابق لسانی تنوع کو در پیش خطرات میں اضافہ ہورہا ہے کیونکہ دنیا سے بہت سی زبانیں ختم ہورہی ہیں ۔ دنیا میں بولی جانے والی اندازاً چھ ہزار زبانوں میں سے کم از کم 43 فیصد زبانوں کو خطرہ ہے جبکہ صرف چند سو زبانیں تعلیمی نظام اور سرکاری سطح پر حقیقی انداز میں اپنا وجود برقرار رکھ سکی ہیں ۔

نومبر 1999کو یونیسکو کی انسانی ثقافتی میراث کے تحفظ کی جنرل کانفرنس کے اعلامیہ میں 21 فروری کو مادری زبانوں کا عالمی دن منانے کا اعلان کیا گیا تھا اور اِسی ادارے کے زیر اہتمام سال 2000 سے اِس روز دنیا بھر میں تقریبات کا اہتمام کیا جاتا ہے۔

برٹش کونسل کی جانب جاری کئے گئے اعداد و شمار کے مطابق دنیا بھر میں تقریباً 350 ملین افراد کی مادری زبان انگریزی ہے جبکہ باقی لوگ ثانوی زبان کی حیثیت سے انگریزی بولتے ہیں ۔  دنیا بھر میں پنجابی 11 اور اردو بولی جانے والی زبانوں میں 19 ویں نمبر پر ہے، دنیا میں سب سے زیادہ بولی جانے والی زبان چینی جسے 87 کروڑ 30 لاکھ افراد بولتے ہیں، 34 کروڑ انگریزی بولتے ہیں۔

پاکستانی ماہرین لسانیات کے مطابق ملک میں مختلف لہجوں کے فرق سے 74 زبانیں بولی جاتی ہیں۔ سب سے زیادہ بولی جانے والی زبان پنجابی ہے جسے 48 فیصد افراد بولتے ہیں جبکہ 12 فیصد سندھی، 10 فیصد سرائیکی، انگریزی، اردو، 8 فیصد پشتو، بلوچی 3 فیصد، ہندکو 2 فیصد اور ایک فیصد براہوی زبان کا استعمال کرتے ہیں۔

ماہرین لسانیات کا کہنا ہے کہ متروک  ہونے والی زبانوں کو جدید طریقوں سے ریکارڈ کر کے محفوظ بنایا جانا بے حد  ضروری ہے تاکہ مستقبل میں ان زبانوں اور ان سے منسلک تہذیب و تمدن کو سمجھنے میں مدد لی جاسکے۔