روس نے یوکرینی علیحدگی پسندوں کے زیر کنٹرول 2 علاقوں کی آزادی تسلیم کرلی

غیر ملکی خبر رساں ادارے کے مطابق روسی صدر نے یوکرینی علیحدگی پسندوں کے زیر کنٹرول 2 علاقوں ڈونیٹسک اور لوہانسک کی آزادی تسلیم کرلی۔ پیوٹن نے روسی فوج کو دونوں علاقوں میں امن قائم کرنے کے لیے اقدامات کا حکم دے دیا۔

روسی صدر  پیوٹن اور یوکرینی علیحدگی پسند رہنماؤں میں باہمی امداد کے معاہدوں پر بھی دستخط ہوئے۔

اس حوالے سے  روسی صدر ولادیمیر پیوٹن نے روسی پارلیمنٹ سے کہا کہ  وہ جلد از جلد اس کی توثیق کرے۔

دوسری جانب امریکی دفتر خارجہ نے اس پر ردعمل دیتے ہوئے کہا ہے کہ روس نے یوکرین کی خود مختاری اور علاقائی سالمیت پر حملہ کیا ہے اور   روس کا اقدام منسک معاہدوں کی مکمل خلاف ورزی ہے۔  ہم روسی اقدام کا مناسب اور مضبوط جواب دیں گے۔

میڈیا رپورٹ کے مطابق فرانسیسی صدر نے اقوام متحدہ سے معاملے پر فوری اجلاس بلانے کی درخواست کی ہے جبکہ  امریکا کی جانب سے روسی اقدام پر سخت معاشی پابندیاں متوقع ہیں۔