شہباز شریف اورآصف زرداری کی ملاقات، تحریک عدم اعتماد اور دیگر آپشنز پرمشاورت

اپوزیشن لیڈر وفد کے ہمراہ لاہور میں بلاول ہاؤس پہنچے جہاں آصف علی زرداری نے پیپلزپارٹی کے دیگر رہنماؤں کے ہمراہ ان کا استقبال کیا۔

ملاقات میں مسلم لیگ (ن) اور پیپلزپارٹی کے علاوہ جمعیت علمائے اسلام کے رہنما بھی موجود تھے۔

ملاقات میں ملکی سیاسی اور معاشی صورتحال سمیت تحریک عدم اعتماد اور دیگر آپشنز پر گفتگو کی گئی۔

اپوزیشن رہنماؤں کی ملاقات کے بعد جاری ہونے والے مشترکہ اعلامیے کے مطابق ملاقات میں رہنماؤں نے تحریک عدم اعتماد کے حوالے سے فیصلہ کن اقدام پر اہم مشاورت کی۔

اعلامیے میں کہا گیا ہےکہ مہنگائی کی آگ عوام کےگھرجلا رہی ہے، حکومت کو گھر بھجوا کر عوام کو اس ظلم سے بچایا جاسکتا ہے۔

میڈیا رپورٹس  کے مطابق قائدین نے اتفاق کیا کہ عوام کی خواہشات پوری کرنے کیلئے تندہی سےکام کریں گے اور جلد رزلٹ دیں گے۔

ذرائع کا کہنا ہے کہ آصف زرداری، شہباز شریف، فضل الرحمان اوربلاول بھٹو نے کل مشترکہ ملاقات پر اتفاق کیا ہے اور تینوں جماعتوں کی سینیئر قیادت کی یہ ملاقات کل دوپہر شہبازشریف کی رہائشگاہ پر ہوگی۔