روس  کا یوکرین میں فوجی آپریشن کرنے کا اعلان 

خبرایجنسی کے مطابق روس کے صدرولادی میرپیوٹن نے ٹیلی ویژن سے خطاب میں کہا کہ روس کویوکرین کی جانب سے لاحق خطرات کے باعث یوکرین میں فوجی کارروائی کی جائے گی۔

روسی صدرنے مزید کہا کہ روس یوکرین پرقبضہ نہیں کرنا چاہتا ۔ کارروائی میں ہونے والے خون خرابے کی ذمہ داری یوکرین پرعائد ہوگی ۔ روس یوکرین کے علاقے دونباس میں خصوصی فوجی آپریشن کیا جائیگا ۔ شہریوں کو محفوظ علاقوں میں جانے کی اجازت ہوگی۔

دوسری جانب  دارالحکومت کیف سمیت مختلف علاقوں میں دھماکوں کی آوازیں سنی گئی ہیں۔ برطانوی نشریاتی ادارے کے مطابق یوکرین کے دارالحکومت کیف اور ڈونباس ریجن میں دھماکوں کی آوازیں سنی جا رہی ہیں۔ 

امریکی صدر جو بائیڈن نے روس کی جانب سے یوکرین پر حملے کی شدید الفاظ میں مذمت کرتے ہوئے کہا کہ یوکرین پر روسی حملہ تباہ کن انسانی نقصان کا سبب بنے گا۔ صدر بائیڈن نے مزید کہا کہ یوکرین حملے پر دنیا روس کو جوابدہ ٹھہرائے گی، یوکرین پر روسی حملےکے نتائج پر آج قوم سے خطاب کروں گا۔

دوسری جانب اقوام متحدہ کے سیکرٹری جنرل انتونیو گوتریس کا کہنا ہے کہ روسی صدر پیوٹن امن کو موقع دیں، پہلے ہی کئی لوگ مر چکے ہیں۔

خیال رہے کہ گزشتہ کئی ہفتوں سے روس اور یوکرین کے درمیان کشیدگی چلی آ رہی ہے اور امریکا نے بھی گزشتہ روز کہا تھا کہ روس 48 گھنٹوں میں یوکرین میں بڑا حملہ کر سکتا ہے۔