یوکرین کے فضائی دفاعی  تنصیبات کو تبا ہ کردیا : روسی وزارت دفاع

روسی وزارت دفاع کی جانب سے جاری بیان میں کہا گیا ہے کہ یوکرین کے فضائی دفاعی  تنصیبات   کو تباہ کر دیا ہے۔ روسی وزارت دفاع کا یہ بھی کہنا ہے کہ یوکرین کی ائیر بیسز کا انفراسٹرکچر ناکارہ بنا دیا گیا ہے۔ 

روسی وزارت دفاع کے مطابق یوکرین کے ملٹری اسٹرکچر اور بارڈر فورسز کو نشانہ بنایا جا رہا ہے، شہروں میں میزائل حملے نہیں کیے جا رہے۔

دوسری جانب یوکرین نے بھی روس کے 5 طیارے اور ایک ہیلی کاپٹر مار گرانے کا دعویٰ کیا ہے۔یوکرین کی وزارت داخلہ کے مشیر  نے روس کے حملے میں  گولہ باری  سے کیف کے علاقے میں 8 ہلاک اور 9 زخمی ہونے کی تصدیق کی ہے ۔ 

خبرایجنسی کے مطابق ڈنمارک نے یوکرین کے دارلحکومت کیف میں اپنا سفارتخانہ بند کردیا ہے ۔ 

واضح رہے کہ روس نے یوکرین پر حملہ کر دیا، جس کے بعد یوکرین کے دارالحکومت کیف میں دھماکے سنے گئے ہیں ۔ برطانوی میڈیا کے مطابق روسی صدر ولادیمیر پیوٹن نے یوکرین پر خصوصی فوجی آپریشن کا اعلان کرتے ہوئے یوکرین کی فوج سے ہتھیار ڈالنے کا مطالبہ کیا ہے۔