ادارہ شماریات نے مہنگائی سے متعلق  ماہانہ رپورٹ جاری کردی

ادارہ شماریات کے مطابق جنوری کے مقابلے فروری میں مہنگائی میں 1.15 فیصد کا اضافہ  ہوا، شہری علاقوں میں مہنگائی 0.93 اور دیہی علاقوں میں 1.48  فیصد بڑھی۔

رپورٹ  کے مطابق فروری 2022 میں مہنگائی کی شرح 12.24 فیصد تک پہنچ گئی ، دیہی علاقوں میں مہنگائی 13.3 اور شہری علاقوں میں 11.5  فیصد رہی جبکہ  جولائی تا فروری مہنگائی کی اوسط شرح 10.52 فیصد رہی۔

ادارہ  شماریات کی رپورٹ  میں بتایا گیا ہے کہ  فروری میں سالانہ بنیادوں پرٹماٹر 310 فیصد، کوکنگ آئل41 اور گھی 38.82 فیصد مہنگا ہوا جب کہ سالانہ بنیادوں پردال مسور 38.42 اورپھل 26 فیصد مہنگے ہوئے۔

اس کے علاوہ ایک ماہ میں پھل 7.32 فیصد اور مسٹرڈ آئل 5.33 فیصد مہنگا ہوا، ایک سال میں سبزیوں کی قیمت میں 33.31 فیصد کا اضافہ ہوا، ایک سال میں گوشت 23.64 فیصد مہنگا اور چاول 11.89 فیصد مہنگے  ہوئے ۔