تحریک عدم اعتماد مہنگائی کے ستائے عوام کیلئے ریلیف ثابت ہوگی : شہبازشریف 

تفصیلات کے مطابق  پاکستان مسلم لیگ (ن) کے صدر اور قائد حزب اختلاف شہبازشریف  نے ایک بیان میں کہا ہے کہ تین سال میں موجودہ حکومت نے گندم، آٹے ، چینی، بجلی کی قیمتوں میں 100 فیصد اضافہ کیا ، تاریخ میں کبھی اتنا اضافہ نہیں ہوا ،  گھی اور خوردنی تیل کی قیمت میں 23 اور 24 روپے اضافے کے بعد 10 روپے پٹرول کی کمی عملاًواپس ہوچکی ہے ، ایل پی جی اور گیس کی قیمت میں 16.37 فیصد اضافے کے بعد نام نہاد ریلیف ہوا میں تحلیل ہوچکا ہے ۔ 

انہوں نے کہا کہ عوام کو ریلیف دینا ہے تو پی ڈی ایل اور بجلی کی قیمتوں میں ماہانہ 4 روپے سے زائد اضافہ واپس لینے کا اعلان کیاجائے۔

شہباز شریف نے کہا کہ ملک میں پٹرولیم بحران کی دہائیاں جاری ہیں، گندم، چینی اور ایل این جی کی طرح حکومت پٹرولیم بحران پر آنکھیں بند کئے ہوئے ہے ۔ 

انہوں نے کہا کہ ملکی تجارتی خسارہ سالانہ بنیادوں پر بڑھ کر82 فیصد ہوگیا ، گردشی قرض میں 114 فیصد سے زائد اضافہ ہوچکا ہے، تجارتی خسارہ 32 ارب ڈالر معیشت کی تباہ حالی کا بیان ہے ، اس خسارے کی قیمت کو ن ادا کرے گا؟ امپورٹ بل میں 55 فیصد اضافہ ہوا، آٹھ ماہ سے مسلسل تجارتی خسارہ بڑھ رہا ہے ۔ 

قائد حزب اختلاف  نے کہا کہ سات ماہ میں توانائی کے شعبے کا گردشی قرض 2.358 ٹریلین کی تاریخی سطح پر پہنچ چکا ہے، یہ رقم کون ادا کرے گا؟  سوال یہ ہے کہ ان خساروں کے لئے رقم کہاں سے آئے گی ؟ کیا عوام کو لوٹ کر پھر ادائیگیاں کی جائیں گی؟ رواں مالی سال میں تاریخ کا بلند ترین تجارتی خسارہ ہونے جارہا ہے،یہ رقم کہاں سے آئے گی ؟ 

ان کاکہنا تھا کہ  خدشہ ہے کہ 10 روپے کا سیاسی ریلیف آنے والے دنوں میں ہر شہری کو سینکڑوں روپے مہنگائی کی صورت ادا نہ کرنا پڑ جائے  ، جھوٹے حکومتی پیکجز کا بوجھ بھی عوام کو اٹھانا پڑے گا  ۔