پاکستان کینیا کے ساتھ اپنے دیرینہ تعلقات کو بہت اہمیت دیتا ہے،سی جے سی ایس سی

پاک فوج کے شعبہ تعلقات عامہ (آئی ایس پی آر ) کی جانب سے جاری کردہ بیان کے مطابق  جنرل ندیم رضا، چیئرمین جوائنٹ چیفس آف اسٹاف کمیٹی، نے کینیا کا سرکاری دورہ  کیا، جنرل ندیم رضا نے کینیا کی مسلح افواج کےسربراہان کے ساتھ وسیع تر باہمی دفاعی تعاون  پر بات چیت کی۔

چیئرمین جوائنٹ چیفس آف سٹاف کمیٹی جنرل ندیم رضا نے کہا کہ  پاکستان کینیا کے ساتھ اپنے دیرینہ تعلقات کو بہت اہمیت دیتا ہے، دونوں ممالک باہمی روابط خصوصاً دفاع، سلامتی کے شعبوں میں تعلقات مزید مستحکم بنائیں گے، پاکستان اور کینیا بامعنی اور طویل المدتی اسٹریٹجک تعلقات کو فروغ دیں گے۔

آئی ایس پی آر کے مطابق کینین قیادت نے پاکستانی مسلح افواج کے اعلیٰ پیشہ وارانہ معیار کو سراہا، کینین قیادت نے پاکستان کی انسداد دہشتگردی کی جنگ میں کامیابیوں کا اعتراف کیا۔

کینین قیادت نے کہا کہ  پاکستان کی علاقائی استحکام خصوصاً افغان امن کے لیے کلیدی کاوشیں قابل قدر ہیں،۔

ترجمان پاک فوج  کا کہنا ہے کہ قبل ازیں کینیا ڈیفنس ہیڈ کوارٹر پہنچنے پر چاق و چوبند دستے نے جنرل ندیم رضا کو گارڈ آف آنر پیش کیا۔