ازبکستان کیساتھ تاریخی  تعلقات کو  دوبارہ  سے  بحال کرنے کا فیصلہ  کیا ہےوزیر اعظم 

وزیر اعظم عمران خان نے ازبک صدر کے ہمراہ مشترکہ پریس کانفرنس  کرتے ہوئے کہا کہ  ازبکستان  کے صدر کو پاکستان  آنے پر خوش آمدید کہتا ہوں ، ازبکستان کیساتھ تاریخی  تعلقات کو  دوبارہ  سے  بحال کرنے کا فیصلہ  کیا ہے،  ازبکستان کیساتھ  ہماری تجارت 50فیصد بڑھی ہے ۔

وزیر اعظم نے کہا کہ  ازبکستان   کے اس خطے کیسا تھ تاریخی تعلقات ہیں  ، ازبک اور اردو زبان میں 30ہزار الفاظ  ایک دوسرے سے ملتے جلتے ہیں، میں نے اور ازبک صدر نے فیصلہ کیا کہ ان تعلقات کو دوبارہ سے جوڑیں، ازبکستان اور پاکستان کی  بزنس کمیونٹی میں   ملاقاتیں ہوئیں، دونوں ممالک کے کاروباری افراد میں  تعلقات بڑھے ہیں۔

وزیر اعظم عمران خان کا کہنا تھا کہ  ظہیرالدین بابر پر ایک مشترکہ فلم بنارہے ہیں ۔ مقبوضہ کشمیر کے مسائل سے  ازبک صدر کو آگاہ کیا ہے۔انہوں نے کہا کہ  اسلاموفوبیا پر دونوں ممالک کا مؤقف یکساں ہے، آزاد ی اظہاررائے کے نام پر مسلمانوں کو تکلیف پہنچائی جاتی ہے۔

اس موقع پر ازبک صدر نے کہا کہ  گرمجوشی سے استقبال کیا  گیا جس  پر وزیر اعظم اور پاکستان کا مشکور ہوں،آپ سب کو  پاکستان ڈے کی مبارکباد دینا چاہتا  ہوں، سیاسی و معاشی پیشرفت پر پاکستان کی کارکردگی کو سراہتے ہیں۔

 ازبک صدر کا کہنا تھا کہ   کورونا وبا کے باعث دورہ مؤخر کرنا  پڑا تھا ، دورہ پاکستان کا بڑی شدت سے انتظار تھا ، دونوں ممالک ثقافتی شعبوں کی بحالی کیلئے ملکر کام کریں گے ، ٹرانزٹ معاملات کوحل کرنے کیلئے معاہدے کیے گئے ہیں ، تجارتی اور اقتصادی تعلقات کے فروغ کیلئے  اقدامات کیے جائیں گے ۔