24 سال کا انتظار ختم ، پاک آسٹریلیا تاریخی ٹیسٹ آج سے شروع ہوگا

تفصیلات کے مطابق پاک آسٹریلیا تاریخی ٹیسٹ کے لیے راول پنڈی میں میدان آج صبح 10 بجے سجے گا، جہاں دونوں ٹیمیں 24 سال کے بعد پاکستان کے میدان میں مد مقابل ہوں گی۔ ٹیسٹ میچ میں  قومی  ٹیم کی قیادت بابر اعظم جبکہ کینگروز کی قیادت پیٹ کمنز سنبھالیں گے۔

پاکستان  کی جانب سے  فاسٹ باولر شاہین شاہ آفریدی  ایکشن میں نظر آئیں گے،جبکہ  بابراعظم کے علاوہ اظہر علی، فواد عالم اور محمد رضوان بھی بلے بازی کے  جوہر دکھائیں گے

آسٹریلیوی ٹیم میں  ا سٹیو اسمتھ اور ڈیوڈ وارنر  مضبوط بلے باز ہیں، مچل اسٹارک،  پیٹ کمنز اور نیتھ لائن اپنی باولنگ سے پاکستانی بلے بازوں کو مشکل میں ڈال سکتے ہیں۔

دوسری جانب پاکستان اور آسٹریلیا کے درمیان پہلا ٹیسٹ میچ بارش سے متاثر ہونے کا خدشہ ہے، محکمہ موسمیات کے مطابق اتوار اور پیر کو راولپنڈی میں بارش کا امکان ہے  ۔  دونوں ٹیموں نے دو روز پنڈی کرکٹ اسٹیڈیم میں فیلڈنگ، بیٹنگ اور باؤلنگ کی سخت ٹریننگ کی تاہم شہر میں ہونے والی بارش کے باعث جمعرات کو شیڈول دونوں ٹیموں کے ٹریننگ سیشنز منسوخ کردئیے گئے۔

واضح رہے کہ این سی او سی کے فیصلے کے مطابق 100 فیصد تماشائیوں کو پنڈی اسٹیڈیم میں داخلے کی اجازت ہوگی، پہلے ٹیسٹ کے لیے دستیاب تمام آن لائن ٹکٹیں فروخت ہوچکی ہیں۔

دونوں ٹیموں کے درمیان  اب تک ہونے والے ٹیسٹ مقابلوں میں آسٹریلیا کو پاکستان پر واضح برتری حاصل ہے، 66 ٹیسٹ میچز میں   33 مرتبہ جیت کینگروز کا مقدر بنی، شاہینوں نے 15 بار میدان مارا جبکہ ا18  میچز بے نتیجہ ختم ہوئے۔

خیال رہے کہ پاکستان اور آسٹریلیا کے درمیان دوسرا ٹیسٹ میچ کراچی میں 12 مارچ اور تیسرا لاہور میں 21 مارچ سے شیڈول ہے۔