سعودی عرب کی روس اور یوکرین کو ثالثی کی پیشکش 

سعودی میڈیا کے مطابق گفتگو کے دوران سعودی ولی عہد نے یوکرین کے مسئلے کے حل کے لیے پیوٹن پر مذاکرات کے لیے زور دیا۔ سعودی میڈیا نے بتایا ہے کہ سعودی عرب نے روس یوکرین تنازع پر ثالثی کے لیے آمادگی ظاہر کی ہے، گفتگو  کے دوران یوکرین کے بحران کے توانائی کی منڈیوں پر اثرات پر بھی تبادلۂ خیال کیا گیا۔

سعودی ولی عہد شہزادہ محمد بن سلمان نے روسی صدر پیوٹن سے کہا کہ سعودی عرب یوکرین اور روس کے درمیان ثالثی کے لیے تیار ہے۔ انہوں نے کہا کہ فریقین کے درمیان ثالثی کے لیے تمام کوششیں بروئے کار لائیں گے۔

روسی صدر پیوٹن سے گفتگو میں سعودی ولی عہد نے تیل کی مارکیٹ میں استحکام برقرار رکھنے کے عزم کا اعادہ بھی کیا۔ سعودی ولی عہد نے تیل کی مارکیٹ میں توازن کے لیے اوپیک پلس کے کردار پر زور دیتے ہوئے کہا کہ اوپیک پلس معاہدے کو برقرار رکھنا ضروری ہے۔

روس کے صدر پیوٹن کا کہنا ہے کہ یوکرین میں جاری آپریشن منصوبے کےمطابق چل رہا ہے ، آپریشن کے تمام اہداف حاصل کر لیے ہیں، انھوں نےیوکرین میں لڑنے اور ہلاک ہونے والے روسی فوجیوں اور ان کے خاندانوں کے لیے مراعات کا بھی اعلان کیا ۔  صدر پیوٹن نے دعویٰ کیا کہ یوکرینی فوجی شہریوں کوانسانی ڈھال کےطورپراستعمال کررہے ہیں۔