تحریک عدم اعتماد :حکومتی رکن قومی اسمبلی شیر وسیر سے لیگی سینئر رہنماؤں کی ملاقات

ذرائع کے مطابق  حکومتی رکن نواب شیر وسیر سے لیگی سینیر رہنماوں کی ملاقات ہوئی ہے، نواب شیر وسیر سے ایاز صادق، سعد رفیق اور رانا ثنا اللہ نے ملاقات کی۔

 ذرائع نے بتایا ہے کہ  ملاقات میں تحریک عدم اعتماد پر حمایت کی درخواست کی، ملاقات پارلیمنٹ لاجز میں ہوئی۔

دوسری جانب  وزیراعلیٰ پنجاب  عثمان بزدار سے مسلم لیگ (ن) کے رکن صوبائی اسمبلی اشرف انصاری کی ملاقات ہوئی جس میں  اشرف انصاری  نے وزیر اعلی پنجاب سردار عثمان بزدار پر اعتماد کا اظہار کیا۔

ذرائع کے مطابق اس موقع پر اشرف انصاری نے کہا کہ آپ نے ہمیشہ ہماری بات سنی اور ہمارے مسائل حل کئے ہیں ، ہمیں آپ کی قیادت پر بھرپور اعتماد ہے۔

وزیر اعلی پنجاب عثمان بزدار کا کہنا تھا کہ  سیاست میں شرافت اور دیانت کے اصولوں کو فروغ دیا ، اپوزیشن کا منفی بیانیہ عوام نے پہلے بھی مسترد کیا، اب بھی کریں گے ، ون مین شو پر یقین نہیں رکھتا، پنجاب میں تمام فیصلے مشاورت سے کئے جاتے ہیں ۔انہوں نے مزید کہا کہ  نیت نیک اورسمت درست ہے ، تنقید برائے تنقید کرنے والے عناصر کا ایجنڈا ترقی کے سفر کو روکنا ہے۔