کوئٹہ : میٹرک کے آج اور کل ہونیوالے پرچے منسوخ

میڈیا رپورٹس کے مطابق کنٹرولر بلوچستان بورڈ شوکت سرپراہ کا اس حوالے سے کہنا ہے کہ  صوبے بھر میں میٹرک کے سالانہ امتحانات جاری ہیں ، تاہم کوئٹہ میں آج اور کل ہونے والے پرچے ناگزیر وجوہات کی بناء پر منسوخ کیے گئے ہیں ۔  منسوخ شدہ پرچوں کی نئی تاریخ کا اعلان بعد میں کیا جائے گا، جبکہ بلوچستان کے دیگر تمام اضلاع میں میٹرک کے سالانہ امتحانات شیڈول کے مطابق جاری رہیں گے۔

دوسری جانب وزیر تعلیم بلوچستان نےکوئٹہ کے تمام اسکولوں کو 2 روزکے لیے بندکرنےکا اعلان کردیا۔ صوبائی وزیر تعلیم نصیب اللہ مری کے مطابق جمعرات اور جمعہ کوکوئٹہ کے تمام اسکول ناگزیر وجوہات پر بند رہیں گے۔ 

بلوچستان یونیورسٹی کو بھی  2 روز کے لیے بند رکھنےکا اعلان کیا گیا ہے۔

رپورٹس  کے مطابق محکمہ داخلہ بلوچستان نے آئی جی پولیس،کمشنرز اور ڈپٹی کمشنرز کو  بھیجےگئے مراسلے میں ہدایت کی ہےکہ صوبے میں سکیورٹی انتظامات  پر نظرثانی کرکے اسے مزید بہتر کیا جائے، پبلک مقامات، تعلیمی اداروں اور  تجارتی مراکز  میں فول  پروف سکیورٹی مہیا کی جائے۔ محکمہ داخلہ کے مطابق یہ احکامات صوبے میں دہشت گردی کی نئی لہر کے پیش نظر دیےگئے ہیں۔